Ua delegacion der Ajuntament de Naut Aran s’a desplaçat entara ciutat de Tarragona tà assistir entath VIII Forum Viles Florides, distincion ara qu’apartien toti es pòbles deth municipi e qu’a coma objectiu era conservacion des espacis verdi e entorns publics damb ornamentacion florau.
Era tematica principau enes ponéncies tractaue sus era gestion resilienta des espacis verdi en tempsi de cambi e qu’auie coma prètzhèt optimizar enes formes d’administrar aguestes zònes damb naues tecniques en tot trincar damb bèri paradigmes qu’enquia ara semblauen inamobibles. Concrètaments, en tractament des zònes publiques, jardins o parcs e era gestion dera aigua coma recors fonamentau.
Enquiath cap-lòc dera còsta daurada an anat era tinent d’alcalde deth consistòri, Anna Geli, eth president dera Entitat Municipau Descentralizada de Bagergue, Marc Tarrau, atau coma eth secretari municipau, Mariano Capdevila. Ena trobada, an pogut promòir eth territòri de Naut Aran damb era rèsta de municipis catalans e an compartit experiéncies e punts en comun damb era Secretària d’Agricultura, Ramaderia, Pesca e Alimentacion dera Generalitat de Catalonha, Rosa Cubel.
Naut Aran ei er unic municipi de Catalonha en quau totes es sues localitats apartien ara distincion de Viles Florides de Catalonha. Bagergue destaque damb 4 flors, sus 5, qu’ei eth maximom e que cap poblacion a; Arties, Salardú, Unha e Tredos n’an 3 e Gessa compde damb un totau de 2 flors.
Era tinenta d’alcalde, Anna Geli, a destacat que “a estat fòrça interessant pr’amor que mos an explicat era perspectiva de coma ei eth panorama ornamentau e paisatgistic en Catalonha e tà on van es politiques que cau préner en aguest sens entà auer eth paisatge mès integrat damb eth miei ambient. Volem felicitar es membres deth jurat que hèn possible aguestes amassades non sonque damb era intencion dera distincion Viles Florides coma tal, mès tanben damb eth prètzhèt d’aportar informacion e conéisher e potenciar mès es nòsti entorns”.