Eth Plen der Ajuntament de Naut Aran a aprovat per unanimitat aguest maitin agilizar es procèssi de tramitacion per òbra menor entàs vesins deth municipi. Se bèth usatgèr vò amiar a tèrme aguesta accion, a compdar d’ara, poirà vier entath consistòri, presentar ua instància generica e pagar eth còst der Impòst sus Bastiments, Installacions e Òbres (ICIO) e dejà poderie iniciar es actuacions.
Damb aguesta naua ordenança des der ajuntament se vò facilitar qu’es vesins e vesies de Naut Aran poguen amiar endauant es sòns petiti projèctes en çò que tanh as sues propietats e que non trapen dificultats respècte ara sollicitud e aprobacion des tramits.
Ath delà, tanben s’a aprovat per unanimitat era aprobacion iniciau deth document unic de proteccion civila municipau (DUPROCIM) de Naut Aran. Aguest document estrategic, que date der an 2016, auie demorat obsolet ena designacion des cargues que s’i ven representadi e i a auut ua actualizacion en aguest sens pr’amor que i auie trabalhadors que figurauen laguens deth DUPROCIM que non èren dejà en actiu.
Fin finau, tanben s’a aprovat provisionaument era modificacion des Normes Subsidiàries de Naut Aran der article 125 entà actualizar es condicions des edificacions de dimension major, qu’afectarie sustot ath parçan de Baqueira. Es edificiacions de Baqueira non se veiràn coma explotacions agropecuàries ne coma edificis en zòna rustica, senon qu’auràn d’entrar en article 48 e amiar endauant plans especiaus en cas que volguen hèr bèra modificacion concrèta. S’a aprovat aguest maitin mès aurà d’èster ratificat pera Comission d’Urbanisme dera Val d’Aran qu’aurà lòc enes pròplèu mesi.