Er Ajuntament de Naut Aran a prebotjat ua accion entà promòir era orticultura entre es sòns vesins. Se tracte des uarts comunitaris en ua idèa que formaue part deth projècte dera equipa de govèrn entestat peth baile, César Ruiz-Canela, e que vò méter en valor eth sector primari autant coma aufrir naues oportunitats a terrens de caractèr rustic en municipi.
En aguest sens, eth consistòri cedirà ua parcèlla dera zòna de Pujo, en Salardú, entà qu’es empadronats en municipi que volguen, poguen compdar damb ua zòna entà poder amiar endauant un petit uart. En totau, s’aufriràn 23 petites parcèlles de uarts entà eri. S’an arrecebut un totau de 27 sollicituds per çò qu’era valoracion ei fòrça positiua.
Eth consistòri aufrirà aguesti terrens de forma gratuïta e sense cap tipe de còst en tot çò qu’a a veir damb es regs e era qüestion der aigua. Çò que se demane des der ajuntament, ei qu’es vesins poguen suenhar es sòns espacis dera milhor forma possible, sense plaçar barratges ne arren que pogue èster considerat privatiu.
Eth baile de Naut Aran, César Ruiz-Canela, destaque que “èm tanplan contenti de prebotjar aguesta accion perqué credem qu’ei quauquarren qu’anaue a auer ua bona acceptacion. Atau a estat damb mès sollicituds que parcèlles aufèrtes e ara sonque manque encetar deth tot eth projècte enes pròplèu setmanes. Demoram qu’es vesins siguen respectuosi e pogue èster ua prumèra peada en aguest sens entà potenciar era orticultura en municipi”.
Era accion serà survelhada per ua enterpresa qu’a era sedença en Naut Aran, concretaments ena poblacion de Gessa que s’encuedarà de tot eth procès de manteniment. Eth contracte de cession serà de forma annau, en tot poder-se renovar tostemp e quan se complissen es condicions establides per ajuntament.
