Eth Plen der Ajuntament de Naut Aran a aprovat per unanimitat era iniciativa impulsada pera equipa de govèrn de Convergéncia Aranesa entara concession demaniau gratuïta ath Conselh Generau d’Aran d’un locau municipau entà, qu’a trauès deth servici de Pompièrs-Emergéncies dera Val d’Aran, se destine a parc auxiliar de pompièrs o punt operatiu permanent.
Coma territòri, Naut Aran compde damb eth 42% der espaci totau dera superfícia de tota era Val d’Aran, ei er emplaçament qu’a mès viuendes de tot aguest parçan, damb mès de 5.000, ath delà que compde damb era estacion d’esquí de Baqueira Beret e grana part des paratges naturaus que se destaquen en Aran. Ath delà, es vesins an reclamat de forma insistenta enes darrèrs ans era creacion d’un punt de pompièrs entà poder actuar damb mès celeritat en casi d’urgéncia coma, per exemple, er incident que se produsic en Salardú en un blòc de viuendes eth passat 7 d’agost o d’autes emergéncies qu’an auut lòc ena sason d’iuèrn o d’ostiu.
Eth baile de Naut Aran, César Ruiz-Canela, afirme que “portam ans en tot pensar coma auer un parc de pompièrs en municipi e, credem que, damb aguesta concession demaniau gratuïta ath Conselh, qu’ei qui gestione aué dia Pompièrs e Emergéncies, poderie esdevier ua realitat e generar mès tranquillitat a toti es nòsti vesins”.
Ath delà, tanben s’a aprovat iniciaument eth projècte basic entath bastiment deth nau Centre Civic e Sociau de Salardú.