Eth Plen der Ajuntament de Naut Aran a aprovat damb es vòts a favor dera equipa de govèrn de Convergéncia Aranesa e es abstencions d’Unitat d’Aran e Aran Amassa eth pressupòst municipau entà 2026 damb un totau de 9.450.000 èuros.
Aguesta chifra ei era madeisha qu’en an 2025, totun, i auie un major numerò d’inversions que hègen a elevar ath torn de dus milions d’èuros era donada, un hèt que destaque qu’es servicis enguan seràn fòrça mès repartidi. En aguest sens, e çò de mès important entath ciutadan ei que, non se va a pujar cap tipe d’impòst entà mantier es servicis de qualitat en municipi. Ath delà, tanben se destaque era grana aportacion que se hè a nivèu de subvencions entàs familhes deth territòri, autant coma as associacions o d’auti projèctes qu’ajuden a revitalizar era economia locau.
En aguest sens, subergessen es 230.000 èuros as Entitats Municipaus Descentralizades, que son transferéncies que se hèn dirèctes pes abitants que residissen en Naut Aran. Tanben d’auti ajuts fonamentaus coma es 65.000 èuros en extraescolares; 70.000 entàs estudiants residenti; 60.000 èuros entath minjador enes diuèrsi centres educatius de Naut Aran; 30.000 èuros entàs persones granes o 25.000 ara Associacion de Familhes d’Alumnes (AFA). Eth globau d’aportacions en subvencions ascendís as 1.528.900 èuros, que mòstre eth clar compromís deth consistòri en benèster de toti es vesins de Naut Aran.
Eth baile, César Ruiz-Canela, explique que “aguesti pressupòsti tornen a èster un viatge mès equilibradi, complissen damb totes es règles de despena e sustot e çò de mès important, non pujam es impòsti as nòsti vesins per gaudir de toti aguesti servicis. Credem en un modèl a on eth ciutadan ei en centre des nòstes politiques e compdem damb tota ua sòrta d’accions entà totes es edats qu’ajuden a hèr era sua vida fòrça mès facila”.