Er Ajuntament de Naut Aran a finalizat pendent era jornada d’aguest dijaus 27 de noveme es accions apertientes as òbres que s’executen ena zòna dera aubèrja de Salardú entara creacion deth District Heating, eth sistèma de calor que foncionarà damb biomassa extrèta des bòsqui dera Val d’Aran e que servirà entà poder cauhar equipaments publics d’ua forma mès eficienta e sostenible.
Damb aguesta accion concludida, eth consistòri mòstre eth sòn compromís damb es energies renovables e verdes e damb eth sòn objectiu de trabalhar pera eficiéncia energetica. Era inversion totau a ascendit enquias 1.408.000 èuros, des quaus, 738.000 èuros seràn subvencionadi a trauès des hons Next Generation dera Union Europèa.
I aurà diuèrsi equipaments que se veiràn beneficiadi d’aguest District Heating. A dia d’aué e, gràcies as nheuades e glaçades, s’a pogut comprovar era sua efectivitat damb ua des rampes calefactades que se tròben ena part iniciau de Salardú. Enes següenti dies s’haràn d’autes pròves ena Sala Polivalenta de Salardú, era piscina, eth pròpri Ajuntament de Naut Aran o, en futur, eth Centre Civic e Sociau de Salardú, que serà eth projècte mès ambiciós qu’aurà auut eth consistòri ena sua istòria.
Eth baile de Naut Aran, César Ruiz-Canela, destaque que “entram de plen en sègle XXI damb aguesta actuacion. Èm eth prumèr municipi dera Val d’Aran qu’amiam endauant un projècte d’aguesta magnitud pr’amor que non i a cap d’emplaçament deth territòri qu’age creat e completat un District Heating tà cauhar diuèrsi equipaments publics damb sonque un procès. Era sostenbilitat e era eficiéncia energetica seràn dus des grani rèptes qu’afrontaram en futur damb eth prètzhèt de redusir era peada de carbòni.”
Era astèra, per ara, serà requectada d’un centre plaçat en Bossòst e un aute en Rialp, ara demora de vèir qu’ei çò que succedís damb eth centre logistic de Les que non ei abilitat encara.