Dempús de mès d’un an de trabalh conjunt entre er Ajuntament de Naut Aran eth Conselh Generau d’Aran, s’a signat un convèni a on, era maxima institucion politica aranesa cedirà ath consistòri aranés era copropietat tà poder hèr era licitacion entà hèr era explotacion deth parcatge de Baqueira 1500 e que la pogue assomir ua enterpresa privada pendent un periòde de 50 ans.
S’an aprovat es plecs de clausules administratives e tecniques pr’amor que s’an d’amiar a tèrme tota ua sòrta d’òbres per valor de 1.700.000 èuros entà reformar e renauir aguest emplaçament. Entre es accions que son previstes en destaquen un nau engondronat, enlumenat, places entà persones damb discapacitat, carregadors electrics, entre d’auti. Serà era entepresa era qu’aurà es drets d’explotacion, totun, sonque poirà crubar coma maximom çò qu’ei establit ena ordenança de regulacion des parcatges de Naut Aran, qu’ei de 0,30 centims era ora.
Eth parcatge compde damb ua superfícia aproximada tà 600 veïculs, des quaus mès de 500 serien entàs torismes, ua seishantea entàs veïculs de mès de 5 mètres e un espaci de 18 places entà autocars.