Er Ajuntament de Naut Aran inaugurarà de forma oficiau eth nau gimnàs de Gessa aguest pròplèu dimars 6 d’abriu entàs persones empadronades en municipi. Dempús de mès de quate mesi de trabalh e damb un pressupòst de 70.000 èuros, eth consistòri a reformat integraument era sala sociau deth pòble e l’a readaptat en un espaci esportiu diferenciat en tres zònes.
En aguest sens, era prumèra, s’a reconvertit en bar, en tot èster atau eth prumèr establiment d’aguest tipe en pòble dempús de mès de 20 ans sense auer-ne cap. Ath delà, s’a adaptat ua auta part entà plaçar tot tipe de maquinària e elements de ‘fitness’. Fin finau, era sala de balh deth pòble s’a adaptat en un espaci de ‘crossfit’ e activitats dirigides que se prepausaràn pendent es pròplèus setmanes.
Damb es restriccions sanitàries actuaus impausades pera Generalitat de Catalonha, eth gimnàs municipau de Naut Aran poirie acuélher ena zòna interiora enquia un 30% deth maximom der aforament totau. D’aguesta manèra, e segontes es mètres quarradi dera installacion, sonque cinc persones poirien emplegar era zòna de bar, d’auti cinc era de ‘fitness’, e cinc mès era sala d’activitats coordinades e ‘crossfit’.
Eth baile de Naut Aran, Cesar Ruiz-Canela, destaque que “trabalham en un sistèma de resèrves online mejançant ua aplicacion entà qu’es nòsti vesins poguen reservar ora e non se trapen ena situacion que, en arribar, non agen era possibilitat d’exercitar-se e mantier abituds saludables.”
Enquiath dia 6 de junh eth gimnàs de Gessa serà gratuït entàs vesins empadronats en municipi entà que poguen gaudir d’aguestes installacions. A compdar d’aguesta data, eth consistòri fixarà un prètz entàs sòns vesins, e ua auta tarifa entara rèsta dera Val d’Aran e toristes.
Er orari de dubertura ath public serà de dimars a dissabte de 14:00 a 21:00 tot e qu’er Ajuntament de Naut Aran trabalhe damb eth futur sistèma de resèrves entà daurir des des 08:00 deth maitin enquias 22:00 dera net.
Ruiz-Canela concrète que “eth nau gimnàs de Gessa supause un besonh que corbim entre es nòsti vesins pr’amor qu’actuauments les calie desplaçar-se a lòcs coma Vielha o Bossòst entà hèr espòrt e mantier abituds saludables.”