Era associacion de comerçants d’Arties amassa damb era EMD d’Arties e Garòs daràn per iniciades es hèstes de Nadau a compdar d’aguest diuendres 5 de deseme damb era encenuda der arbe de Nadau amassa damb eth lançament de fanaus ath cèu, ua des accions mès espectaculars e presenciades per mès persones.
Aguest eveniment, qu’a lòc ena Plaça Ortau d’Arties, apròpe a centeats de persones vengudes deth pròpri municipi de Naut Aran, autant coma era rèsta dera Val d’Aran o de d’auti punts deth territòri. Era magia e simbolisme que se genère ath long d’aguesta tradicion, hè a vier a un public familhar que gaudís d’ua forma diferenta der inici dera sason. Er acta s’iniciarà entàs 18:30 damb ua mòstra de dances araneses aufrides peth grop de balh ‘Es Fradins de Vielha’, que amiaràn endauant un conjunt de dances enquias 19:00 dera tarde. Serà alavetz quan arribarà eth gran moment dera tarde, quan dejà era escuretat aurà aumentat, que s’alugarà er arbe e se procedirà ath lançament de fanaus en cèu en tot aufrir ua espectaculara e polida imatge.
Era bailessa dera EMD d’Arties e Garòs, Lina Fanlo destaque que “aguesta jornada non pòt arribar en un milhor moment. Ei fantastic començar e dar er inici a ua naua sason d’iuèrn damb es nòstes montanhes plies de nhèu e damb eth heired i a ua grana sensacion que serà ua excellenta temporada d’esquí. Voi convidar a toti es vesins, persones dera Val e rèsta d’emplaçaments a que descorbisquen Arties, que venguen a gaudir der eveniment pr’amor qu’ei ua des accions mès emblematiques der an que viuem”.