Er Ajuntament de Naut Aran avalore fòrça positivaments eth conjunt d’accions ludiques, esportiues e culturaus que s’an amiat a tèrme en municipi damb er objectiu de poder aufrir as vesins e visitaires un gran repertòri d’alternatives entà toti es publics pendent aguesti mesi d’ostiu.
En aguest sens, an destacat activitats coma eth Salardú Country Ròck Festival, qu’a auut mès assisténcia de public que jamès; eth hestau de Salsa, Bachata e Kizomba (SBK) de Garòs, qu’a amassat a mès de 600 aimants deth balh en aguesta localitat; eth hestau culturau Sòns dera Garona de Salardú, que s’a assolidat coma un format fonamentau enes maitins e tardes d’ostiu deth territòri damb ua grana aufèrta occitano-gascona o d’auti coma, per exemple, era dobla visite-concèrt deth Romanic Musicau que se celebrèc enes glèises de Sant Andrèu de Salardú e de Santa Maria d’Arties damb ua excellenta acuelhuda o er Ohana Fest.
En çò qu’a a veir damb eveniments esportius, Naut Aran a tornat a èster un autentic referent damb era arribada de pròves coma era Val d’Aran by UTMB, era Hard Bike, She Bikes Aran enes entorns dera estacion d’esquí de Baqueira Beret, eth campionat de Catalonha de biciclèta de carretèra, organizat per Royal Cycling, o era grana aufèrta d’equipaments que se possedís en tot eth municipi.
Eth baile de Naut Aran, César Ruiz-Canela, destaque que “era nòsta intencion principau pendent aguest ostiu a estat qu’es visitaires non mos coneishen sonque pes nòsti entorns naturaus, que tanben, mès les auem volut aufrir ua grana aufèrta d’activitats entà tota era familha entà demostrar-les qu’eth nòste municipi se tròbe fòrça actiu en tota sòrta d’eveniments: des de culturaus, a esportius o d’auti d’estil mès ludic. Seguiram en tot trabalhar entà dinamizar era economia locau e qu’es nòsti vesins tanben poguen gaudir de totes aguestes accions”.
De cara ad aguest mes de seteme, i aurà un aute eveniment esportiu de naut nivèu previst deth 19 ath 21 coma ei era 2a edicion dera Infinite Race Val d’Aran.