Er Ajuntament de Naut Aran a iniciat aguesta setmana ena zòna dera aubèrja de Salardú es òbres entara creacion deth District Heating, eth sistèma de calor que foncionarà damb biomassa extrèta des bòsqui dera Val d’Aran e que servirà entà poder cauhar equipaments publics d’ua forma mès eficienta e sostenible.
Damb aguesta accion, eth consistòri mòstre eth sòn compromís damb es energies renovables e verdes e damb eth sòn objectiu de trabalhar pera eficiéncia energetica. Era inversion totau ascendirà enquias 1.408.000 èuros, des quaus, 738.000 èuros seràn subvencionadi a trauès des hons Next Generation dera Union Europèa.
Entre es equipaments mès destacadi que se veirien beneficiadi se tròben era Sala Polivalenta de Salardú, era escòla Ruda, era piscina d’aguesta poblacion, eth pròpri Ajuntament de Naut Aran, es rampes calefactades que se tròben en aguesta localitat atau coma eth futur Centre Civic e Sociau de Salardú, qu’ei eth projècte mès ambiciós en tota era istòria d’aguest consistòri.
Eth baile de Naut Aran, César Ruiz-Canela, destaque que “èm fòrça illusionadi peth començament d’aguestes accions que s’emmarquen laguens des nòstes politiques de sostenibilitat. Trabalham en fòrça encastres e ahèrs entà favorir era vida de toti es nòsti vesins e aguesta accion ei un exemple d’açò. Eth district heating de Naut Aran mos harà a hèr un saut energetic e sostenible fòrça important entà seguir en tot èster un municipi referent ena S.XXI.”
Es òbres dera sala de caudères e era rèsta d’execucions sus tot çò qu’a a veir damb eth District Heating ei previst que finalizen damb un tèrme maximom de 3 mesi.