Er Ajuntament de Naut Aran a aprovat aué damb es vòts a favor dera equipa de govèrn de Convergéncia Aranesa e es abstencions d’Unitat d’Aran e d’Aran Amassa ua modificacion pressupostària per valor de 187.000 èuros ena quau i a actuacions tanplan destacades.
En prumèr tèrme, se destinaràn 100.000 èuros entà amiar endauant er enlumenat der arriu Malo de Baqueira en una accion que vò méter en valor aguest espaci deth nuclèu de Baqueira. Era apòsta deth consistòri per potenciar er endret de Baqueira enes darrèrs ans ei clara e damb aguesta futura accion se reafirme aguest compromís. Se compdarà damb ua subvencion deth Plan Unic d’Obres e Servicis de Catalonha per valor de 82.428 èuros.
Ath delà, se trabalharà ena milhora dera senhalizacion e arranjament de senders e caminades e excursions dera zòna de Colomèrs. Damb un pressupòst de 75.000 èuros, eth 100% serà subvencionat peth pròpri Parc Nacionau damb er objectiu de milhorar er accès as visitaires ad aguest espaci qu’ei un des mès demandadi sustot en ostieu pes persones que s’apròpen a Naut Aran.
Fin finau, era tresaua accion, provie d’un aument dera subvencion qu’aufrirà er Ajuntament de Naut Aran ar Institut d’Estudis Aranesi-Acadèmia Aranesa dera Lengua Occitana. Eth convèni que signaue eth consistòri ans endarrèr damb aguesta institucion ère de 5.000 èuros annaus, e ara ascendís as 17.000 èuros en totau pr’amor que s’impulsarà eth projècte de crear un libre especific sus era microtoponimia de Naut Aran. Atau, se poderàn conéisher toti es endrets qu’entoren es pòbles deth municipi.