Er Ajuntament de Naut Aran complemente era excellenta aufèrta toristica qu’a damb toti es equipaments esportius, culturaus atau coma d’auti elements coma era gastronomia damb un nau projècte entà potenciar eth torisme familhar qu’a coma objectiu eth public infantil.
En aguest sens, s’a impulsat eth jòc “Marco Topo en Salardú”. Se tracte d’un jòc d’exploracion educatiu que permet que familhes damb mainatges e mainades d’entre 5 e 12 ans se botgen per Salardú de forma autonòma e poguen realizar ua visita autoguiada, damb pròves de cèrca gamificades que meten en valor er auviatge istoric, culturau e paisagistic deth municipi.
Eth jòc consistís en recórrer es lòcs soslinhadi en mapa, resòlver diferenti rèptes damb eth telefòn mobil e plaçar, a manèra d’assolidatge, er adesiu en tot correspóner a cada pròva superada en mapa. En finalizar eth jòc, es participaires receberàn un diplòma en corrèu electronic que s’agen enregistrat damb eth.
Entà jogar a Marco Topo sonque cau arténher, de forma gratuïta, eth mapa de jòc enes burèus de torisme plaçat ena pròpria poblacion de Salardú e disposar d’un telefòn mobil damb connexion a internet. Un viatge qu’era familha a eth mapa, introdusissen eth còdi dera aventura (MTSALARDU) ena pagina web de Marco Topo (www.marcotopo.com) e ja pòden començar a jogar.
Eth baile de Naut Aran, César Ruiz-Canela, destaque que “volem aufrir alternatiues entà toti es publics que visiten eth nòste municipi e es petiti son ua prioritat. Auem dejà era gymkana digitau toristica mès, ara, damb eth projècte de Marco Topo, credem qu’es mainatges ac passaràn fòrça ben e poderàn descorbir es nòsti cornèrs, amassa damb es familhes d’ua forma divertida e unica”.
Ciutats, pòbles, musèus, rotes de senderisme o parcs naturaus compden damb eth jòc Marco Topo entà milhorar era experiéncia deth public familhar e méter en valor eth sòn auviatge a trauès deth jòc.