Er Ajuntament de Naut Aran a iniciat es òbres de bastiment entà ua crear naua e modèrna oficina de torisme ena plaça dera Querimònia de Salardú. Eth pressupòst totau dera actuacion ascendís enquias 199.504,36 euros, des quaus, 149.504,36 apertien a hons pròpris deth consistòri e es auti 50.000 euros provien deth Conselh Generau d’Aran pera signatura deth convèni de collaboracion pera taxa toristica.
Cau rebrembar qu’er ajuntament tornèc a formar part de Foment Torisme Val d’Aran, en tot aportar ath Conselh era taxa toristica corresponenta deth dusau e deth tresau trimèstre de cada anualitat, a diferéncia de çò qu’auie hèt enquia 2023 quan aportaue era part coresponenta ath totau annau des hons recebudi. Damb aguest convèni, s’acordèc tanben eth finançament de 50.000 euros per part dera maxima institucion aranesa ad aguesta naua oficina de torisme de Salardú, autant coma milhores ena oficina qu’ei plaçada en Arties.
Era òbra civila aurà ua durada de tres mesi e, enes sòns inicis, a estat visitada peth baile der Ajuntament de Naut Aran, César Ruiz-Canela e era sindica d’Aran, Maria Vergés. Andús an parlat sus era importància de potenciar er airau toristic en municipi e d’aufrir un servici adaptat as besonhs deth sègle XXI.
Ruiz-Canela afirme que “aguesta naua oficina de torisme aportarà mès valor ath nòste parçan e credem qu’ei ua inversion que poténcie aguest airau en territòri. Eth projècte compde damb ua part de finançament deth Conselh Generau, per acòrd qu’artenhèrem damb eri sus era taxa taxa toristica. Seguim apostant per un consistòri de present e futur e peth benèster de toti es nòsti vesins”.