Viles Florides pòble de Salardú

SALARDÚ

Salardú, cap-lòc deth municipi de Naut Aran, siguec ua vila fortificada pendent era epòca medievau. D’aguest periòde ençà, encara se consèrve ua part dera muralha e eth portau deth Palhars. Damb ua poblacion de 462 abitants, a coma nuclèu ahijut Baqueira damb 177 abitants. Des de Salardú i a ua entrada ath Parc Nacionau d’Aigüestortes e Estanh de Sant Maurici, qu’aufrís ua grana possibilitat de rotes e passejades.

Ena part nauta deth pòble ei plaçada era glèisa de Sant Andreu. Ei a on i auie estat eth castèth, deth quau actuauments sonque en manquen rèstes. En interior s’i consèrve era talha romanica deth famós Crist de Salardú. D’auti atractius deth pòble son era hònt ueitcentista dera plaça Major e ua mòla hariera tipica dera comarca, que s’a restaurat entà mostrar as visitants coma foncionauen.

Projècte Florit

Salardú dispòse de diuèrses zònes ajardinades publiques e privades, a on en destaquen eth jardin dera psicina municipau, eth dera Escòla Ruda, eth dera glèisa de Sant Andreu o era zòna de jòcs infantius dera Mòla. Ath delà, totes es terrasses des bars e restaurants son plies de flors, e es hotèls e viuendes deth pòble an d’abituda adornar es façades e balcons damb flors.

En pòble se diferencien dues parts: eth nuclèu ancian format per carrèrs estreti, cases tipiques araneses, hònts ornamentaus e bòrdes ancianes a on non hè guaire temps i viuien vaques e oelhes; e es comunitats de propietaris, damb viuendes e apartaments d’edificacion tipica aranesa damb jardins damb arbes e flors.

Eth nuclèu de Baqueira se caracterize per granes zònes ajardinades damb arbes autoctòns e a on destaque ua passejada botanica, damb guida explicativa inclodida, creada hè dus ans per toti es jardins deth nuclèu.

Coma nauetats, est an passat se recuperèc un passeig fluviau per arriu Unhòla que connècte damb eth pòble d’Unha mejançant un pònt que pènge. Entà aguest cors, ei previst eth lançament d’ua campanha entà promòir eth compostatge en municipi.

Qualificació