Er Ajuntament de Naut Aran destinarà ua partida de 70.000 èuros en matèria d’ajudes sociaus dirigida as familhes deth municipi entà que poguen auer mès facilitats economiques ara ora d’apuntar as sòns hilhs a bèra activitat extraescolara pendent tot er an.
Ei eth prumèr viatge que se presente aguesta linha de subvencions dirèctes des que se veiràn beneficiadi enquia 350 mainatges e mainades deth Naut Aran de 0 a 17 ans.
Entà poder optar ara ajuda, s’aurà de presentar ua instància en Ajuntament de Naut Aran amassa damb ua factura dera activitat o activitats en cas que sigue mès d’ua. Eth maxim que se poderà arténher per escolan serà de 200 èuros s’era soma de totes es factures o rebuts des activitats ei de 1000 èuros o mès. En cas qu’era quantitat aportada sigue inferiora ad aguesti 1000 èuros, se darà un 20% deth totau dera factura presentada.
Eth baile deth consistòri de Naut Aran, Cesar Ruiz-Canela, destaque que “volem qu’es nòsti joeni agen era oportunitat de poder realizar bèra activitat extraescolara sense cap tipe de problèma. Non auem hèt excepcions, atau qu’auem considerat qu’activitats esportiues, culturaus coma era musica o classes de repàs, poguen èster justificades entà arrecéber era subvencion”.
Ath delà, ahig que “credem qu’aguesta mesura serà fòrça plan ben arrecebuda pes familhes e pensam qu’ei ua bona iniciatiua enes tempsi que corren damb era crisi sanitària peth coronavirus”.
Es ajudes se poderàn sollicitar enquiath 31 de deseme.