Era pellicula “A 1000 km de la Navidad”, protagonizada per Tamar Novas e Andrea Ros e dirigida per Álvaro Fernández veirà era lum en portau de Netflix aguest pròplèu 24 de deseme entà tot eth mon. Rebrembam qu’aguest longmetratge a estat rodat en part ena poblacion d’Arties, en municipi de Naut Aran.
En hereuèr d’aguest madeish an, concrètaments deth 3 ath 5, era equipa de rodatge se desplacèc enquia aguest lòc entà amiar a tèrme diuèrses scènes restacades damb eth Nadau enes que participèren diuèrsi vesins dera Val d’Aran, atau coma bèri comèrci dera zòna. Er enregistrament siguec tot un succès e ara, diuèrsi mesi mès tard, aguest projècte ges endauant damb ues granes expectatives entà aguestes dates tant senhalades.
Era bailessa dera poblacion d’Arties, Lina Fanlo, destaque que “entara poblacion d’Arties, poder aparéisher en ua grana produccion de Netflix supausarà ua grana repercussion e publicitat pr’amor que toti poderàn conéisher es nòsti entorns. Açò seguraments se tradusirà en un major torisme enes pròplèus ans e era reactivacion dera nòsta economia locau.”
Ath delà, concrète que “participèc fòrça gent deth pòble e tanben diuèrsi comèrci de restauracion, hèt que mos hè fòrça erosi.”
Aguesta produccion de Netflix se rodèc principauments ena zòna deth casc antic d’Arties en tot adaptar-lo ena epòca de Nadau en tot coincidir damb era data dera sua estrea.