Er Ajuntament de Naut Aran a aprovat en session plenària d’aguest dijaus 18 de junh damb es vòts a favor de Convergéncia Aranesa e es abstencions d’Unitat d’Aran e d’Aran Amassa eth projècte basic deth Centre Civic e Sociau de Salardú. Aguesta idèa, impulsada pera equipa de govèrn, s’a reformulat entà garantir ua major eficiéncia autant coma un menor còst entàs vesins deth municipi. En aguest sens, s’a redusit en mès d’un 40% en tot passar d’un còst totau aproximat de 24 milions d’èuros enquias 14 milions d’èuros, IVA includit.
Laguens d’aguest futur equipament son contemplades, entre d’autes, 9 viuendes qu’anaràn destinades entàs persones que residissen en Naut Aran, damb preferéncia entara gent grana e es joeni. Ath delà, tanben se bastirà ua piscina cubèrta de 1,40 mètres de prigondor entà qu’es petiti poguen hèr activitats extraescolars tot er an, era gent grana pogue hèr activitat fisica o era rèsta d’usatgèrs la poguen emplegar pendent tot er an. D’un aute costat, tanben se respon a ua des granes demanes istoriques d’aguest parçan damb era creacion d’ua sala de congrèssi que poirà acuélher convencions damb un aforament aproximat de 300 persones, quauquarren que potenciarà mès eth municipi. En d’autes qüestions, tanben se harà un nau gimnàs, ua grana plaça damb zònes verdes entà passejar e dues plantes de parcatge soterrat.
Eth baile de Naut Aran, César Ruiz-Canela, afirme que “aguest projècte ei eth mès ambiciós dera istòria d’aguest consistòri e auem volut pensar en toti es collectius. Compdaram damb fòrça naui equipaments entàs nòsti vesins, damb naues viuendes que se somaràn as que a dia d’aué bastim, e naues oportunitats de futur laborau e de léser. Eth Centre Civic e Sociau de Salardú serà ua realitat enes pròplèu ans”.
Tota aguesta naua bastissa se cauharà mejançant eth ‘District Heating’ de Salardú damb biomassa, çò que garantirà ua grana reduccion de còsti e tanben minorar era peada de carbòni, qu’ei un des principaus objectius d’aguest ajuntament.
Fin finau, entre d’autes qüestions, s’an aprovat dues mocions en defensa deth professorat e dera educacion publica de qualitat ena Val d’Aran e Catalonha, ua per part de Convergéncia Aranesa e ua auta per part d’Aran Amassa.
