Aguest maitin ath torn des 10:30 deth maitin en stand de Turespaña dera Hèira Internacionau de Torisme (FITUR) de Madrid s’an liurat es acreditacions oficiaus des 6 naui pòbles que formaràn part deth reconeishement de “Los pueblos más bonitos de España” a compdar d’aguest an 2023. Entre eri, en destaquen es dues localitats araneses deth municipi de Naut Aran que son Arties e Garòs.
Aguesta distincion a estat remassada pera bailessa d’Arties e Garòs, Lina Fanlo, e pera representanta deth pòble de Garòs, Maria Angels Ordax, qu’an mostrat ua grana satisfaccion en acte de liurament deth diplòma que confirme era sua entrada en aguest prestigiós cercle exclusiu de sonque 111 pòbles. Eth trabalh de fòrça ans per part des vesins d’aguesti dus iconics lòcs s’a vist recompensat e gràcies ar impuls des representantes elegides s’a pogut a arténher aguesta naua certificacion. Entà auer accès ada era, calie complir damb bèri requisits coma, per exemple, auer ua poblacion menor de 15.000 abitants, un auviatge arquitectonic o naturau certificat, conservar es façades e auer ua circulacion controlada de veïculs o suenhar er aspècte florau e es zònes verdes, amassa damb ua grana neteja e manteniment.
Sus açò, era bailessa d’Arties e Garòs, Lina Fanlo, destaque que “es nòsti pòbles van en ua grana direccion des de hè dejà fòrça ans. Eth nòste objectiu a estat principauments eth d’auer es nòsti espacis çò de mès de polidi possibles e sabem qu’èm en tot artenhèc. Es visitants que s’apròpen ath nòste territòri ac saben e mos feliciten per açò, pr’amor qu’eth municipi de Naut Aran ei simplaments preciós”.
Ath delà, ahig que “voi dar es gràcies a toti es vesins pr’amor qu’aguesta victòria ei sua e, a compdar d’ara, èm un des pòbles mès polidi d’Espanha, tot ua reconeishença ath bon hèr de toti. Seguiram en tot trabalhar ena madeisha linha entà portar naues distincions sostenibles damb eth nòste entorn”.
A part d’Arties e Garòs, tanben an estat seleccionadi entà aguest 2023 es localitats de Durro (Lhèida), Castrojeriz (Burgos), Burgo de Osma (Sòria) e Trevélez (Granada).