Aguest maitin s’a constituït eth plen der Ajuntament de Naut Aran que formarà part dera corporacion deth 2023 ath 2027. En aguest sens, César Ruiz-Canela a estat escuelhut coma baile pendent es pròplèu quate ans gràcies ara majoria absoluta qu’artenhec enes eleccions deth passat 28 de mai damb un totau de 5 còssos de 9 possibles.
Er equip de govèrn de Convergéncia Aranesa que trabalharà entà melhorar era qualitat de vida de toti es vesins e visitants deth municipi serà compausat peth pròpri baile e compdarà enes sues files coma tinenta d’alcalde a Anna Geli, persona damb ua grana coneishença laguens des institucions e damb era rèsta deth sòn equip abituau en passades legislatures com son David Torres, Andrés España e Marcos Amiell.
Eth plen tanben serà format per tres còssos deth grop d’Unitat d’Aran que seràn Marc Tarrau, Edgar Gerotina e Josep Canut. Fin finau, pera formacion d’Aran Amassa tanben entre coma naua representanta Rosanna Sellart.
Eth baile de Naut Aran, César Ruiz-Canela, explique que “seràn quate ans enes que un des nòsti grani objectius serà potenciar er abitatge sociau entà poder aufrir alternatiues a joeni e familhes deth nòste municipi a un prètz accessible entà poder residir tot er an”.