Es diferéncies entre òmes e hemnes encara son notòries en aguest an 2021 ena nòsta societat. Es vesins e vesies dera Val d’Aran tanpòc mos escapam ad aguesta realitat pr’amor qu’a dia d’aué encara se pòden veir fòrça desigualtats en diuèrsi airaus deth nòste territòri.
Ei per açò que mos cau lutar per ua societat mès justa, igualitària e sustot damb volentat de cambi, entà poder auançar e deishar endarrèr paradigmes deth passat. Vam en ua bona linha evolutiva, mès, en aguest sens, non podem arturar-mos, senon tot eth contrari, auem de sarrar damb mès fòrça entà que bèth dia totes es nòstes accions de paraula siguen realitats e non s’agen de reclamar en un dia com aguest.
Volem arregraïr a totes es hemnes que trabalhen entara nòsta institucion entà milhorar era vida des persones de forma dirècta. Ath delà, as representants elèctes deth nòste municipi coma son Lina Fanlo, Henedina Baños, Mari Àngels Ordax, Rosa Montilla, Maria Aran Nieto, Claudia Ramos, Ariadna Farrés, Antonio Martinez, Ester Bruna o Neus Canals en cas deth pròrpi ajuntament.
Ètz ua grana referéncia, un exemple de bona praxis e ua forma de demostrar ath mon qu’èster en lòcs de responsabilitat non ei sonque causa d’òmes.
Des der Ajuntament de Naut Aran mos volem somar a totes es mòstres reivindicatives en aguesta jornada deth 8 de març e volem aufrir eth nòste compromís a èster part dera solucion.