Damb era volentat de dar responsa as consultes e comentaris arrecebudi arraïtz dera divulgacion en desparièrs mejans de comunicacion, de notícies relatives ath cambi enes condicions de parcatge nocturn e hèr net de veïculs en municipi de Naut Aran, e sustot en Nuclèu de 1500, er Ajuntament de Naut Aran, en consens damb es agents sociaus que interactuen en nòste territòri e es diuèrses institucions dera Val d’Aran, emet eth present comunicat.
Es parcatges deth nòste municipi son concebudi entà dar responsa as besonhs de parcatge transitòri des visitants e vesins dera Val, en tot perméter era mobilitat entre nuclèus, en tot facilitar er accès a servicis, comèrci e ara estacion d’esquí. Eth sòn emplec coma airaus de “pernòcta”, sustot es de longa durada, un usatge entath quau non a estat concebut ne projectadi, tensione aguesta mobilitat, en tot crear disfuncions, especiuament en non dispausar des servicis de besonh entà garantir es condicions igieniques e sanitàries minimes requerides entà dita fin.
S’a considerat de besonh regular e ordenar es diuèrsi emplecs e besonhs que confludissen e afècten as diuèrsi parcatges deth municipi e respècte de tota sòrta de veïculs. Aguest besonh se manifèste arraïtz des problemes de convivéncia gessents entre es usatgèrs en rotacion, hèr net enes veïculs en transit, hèr nets de longa durada, vesins, comerçants e trabalhadors. Per açò, entenem qu’ei de besonh préner mesures provisionaus, entretant se trabalhe entà cercar solucions definitives, que possiblament auràn de contemplar era creacion d’airaus d’acampada entà autocaravanes, enes tèrmes que les conceben ena vigenta Lei de Torisme.
En aguest sens, en municipi de Naut Aran:
Se delimiten dues zònes a on se permet hèr net de veïculs, sense limit orari, plaçadi un d’eri en parcatge deth camp de fotbòl de Naut Aran, plaçat a 50 mètres dera carretèra C-28 e a 8 quilomètres de Baqueira, a on existís era parada d’autocar e damb ua capacitat d’apruprètz 50 veïculs. E era dusau zòna plaçada ena entrada deth pòble d’Arties, just dempús de crozar eth pònt deth barratge dera Garona, en ua finca propietat der Ajuntament e en ua zòna pas inundabla, a ua distància de 7 quilomètres dera estacion e damb ua capacitat d’apruprètz 40 veïculs. Andús nuclèus compden damb servici de transpòrt public en toti es pòbles dera Val d’Aran plaçadi ath long dera C-28.
– En nuclèu de 1500 se delimite ua zòna ena naua perimetrau, ath deuant dera casèrna dera Guardia Civil, destinat ath parcatge damb “pernòcta”, totun limitat a 72 ores.
– Sus eth parcatge Nuclèu 1500. Se zonifique eth parcatge, en tot destinà’c a desparièrs emplecs:
– Ua prumèra zòna, destinada ath parcatge rotatòri de veïculs de mens de 5m de longada.
– Ua dusau zòna, destinada ath parcatge d’autocars.
– Ua tresau zòna, destinada ath parcatge diürn, (en orari de 8.00 ores a 22.00 ores), de veïculs de mès de 5m. Destinat a zòna de neteja de nhèu en orari nocturn
– En çò que tanh ara rèsta de parcatges deth municipi, ne engodronadi ne senhalizadi orizontaument, e d’acòrd damb era Ordenança Municipau, actuauments en periòde d’exposicion publica, s’establís eth parcatge regulat per orari, en tot èster gratuït entre es 10.00 ores e es 0.00 ores, de pagament dehòra de dit orari, damb un impòrt de 1 èuro per ora o fraccion. Eth pagament aurà de realizar-se enes parquimètres plaçadi enes parcatges. Entàs veïculs damb abitança fiscau en municipi de Naut Aran eth parcatge serà de franc es 24 ores.
En cadun des parcatges se plaçaràn es usatges permetudi e es instruccions entara corrècta utilizacion d’aguesti espacis. Pregam adequacion enes madeishi, e eth maxim respècte entà toti es sòns usatgèrs e er entorn.
Fin finau cau rebrembar qu’era acampada liura ei proïbida en tot eth territòri, coma n’ei era “pernòcta” laguens des espacis d’especiau interès mieiambientau, coma son es parcatges plaçadi enes zònes nautes deth nòste municipi.