Era EMD d’Arties e Garòs amassa damb er Ajuntament de Naut Aran organizen aguest dimenge 18 de junh ua conferéncia ena Sala Sociau d’Arties ena que se commemòren es 10 ans des aiguats der an 2013 enes qu’era Val d’Aran patic ua grana devastacion pera fòrça dera aigua, era tèrra e es pèires des dera zòna de Naut Aran enquiath Baish Aran. Era conferéncia se ditz “10 ans des aiguats e era emergéncia climatica non s’arture” e la harà eth meteorològ Francesc Mauri, professionau damb ua ampla trajectòria en sector.
Cau rebrembar qu’aguestes inondacions deth 18 de junh der an 2013 causèren grani damatges estructuraus en tot eth territòri, encara que, per sòrt, non s’auec de lamentar victimes gràcies ara grana accion e coordinacion entre es servicis d’emergéncia e vesins des diferenti pòbles d’Aran.
En aguest sens, era bailessa dera EMD d’Arties e Garòs, Lina Fanlo, destaque que “aguesta conferéncia tractarà sus un hèt istoric d’Aran. Atau e tot m’agradarie rebrembar que sigueren es vesins es que tanben hèren istòria pr’amor que non rebrembi auer vist un exercici de solidaritat tan grana entre toti perqué s’abilitèren espacis, s’aufric viuenda ad aqueri que perderen tot e gesseren toti en carrèr a netejar e apraiar es desperfèctes ocasionadi per aguest fenomèn naturau”.
Atau madeish, e respècte voler hèr ua conferéncia des inondacions, Fanlo explique que “en un plen dera EMD expliquèrem era nòsta volentat de commemorar es 10 ans des inondacions e credem que damb aguesta conferéncia podem ajudar as vesins e ara rèsta de persones de la Val d’Aran a compréner qué podec passar e çò de mès important, qué podem hèr entà mitigar es efèctes de d’autes inondacions se tornen a arribar en uns ans”.
Es pòbles e entorns mès afectadi dera Val d’Aran sigueren es que seguien eth cors deth Garona. Pendent aguesti darrèri ans, er Ajuntament de Naut Aran s’a encuedat d’apraiar totes es afectacions estructuraus que i auec a causa d’aguesta catastròfa naturau.