Eth Plen der Ajuntament de Naut Aran a aprovat aguest maitin ua modificacion deth pressupòst der an 2020 per valor de 906.000 èuros entà realizar melhores en municipi. Era votacion a gessut endauant damb es vòts favorables de Convergéncia Aranesa e era abstencion d’Unitat d’Aran e Aran Amassa.
Laguens des accions previstes en aguesta modificacion, destaquen era creacion d’un nau gimnàs en Gessa per valor de 70.000 èuros, era pavimentacion d’un tram de 2,4 quilomètres dera carretèra d’Aiguamòg per 240.000 èuros, 200.000 èuros entara dusau fasa deth carrèr Plaus d’Arties, 150.000 èuros entara reforma deth carrèr Major de Salardú o 50.000 èuros entà reabilitar era entrada ara poblacion de Gessa.
Eth baile Cesar Ruiz-Canela afirme que “aguesta modificacion ei fòrça de besonh entà amiar a tèrme accions que melhoraràn era vida des nòsti vesins coma ei eth bastiment d’un nau gimnàs en Gessa. Credem qu’ei ua apòsta pes abits saludables que portarà fòrça beneficis ath municipi.”
Ath delà, s’a aprovat tanben aguest maitin eth pressupòst de 6.700.000 èuros entar an 2021 damb es vòts a favor de Convergéncia Aranesa e era abstencion d’Aran Amassa e eth vòt en contra d’Unitat d’Aran, mès en aguest cas sonque en apartat d’inversions. En aguest sens, i a ua leugèra descenuda de 40.000 èuros dera quantitat pressupostada per çò que hè ar an anterior pr’amor d’ua rebaisha deth 33% deth cànon de Baqueira Beret.
Totun, s’aumenten es ingrèssi enes plusvàlues, e es subvencions per part dera Generalitat e era Deputacion de Lhèida coma per exemple gràcies ath PUOSC. Atau madeish, s’a aumentat tanben era partida as EMD’s enquia arribar a un totau de 400.000 èuros. En d’auti ahèrs, tanben s’a incrementat eth percentatge enes partides de politica sociau per ampliament des contractes que hè eth consistòri en ostieu e es ajudes as familhes deth municipi.
Sus açò, Ruiz-Canela destaque que “maugrat era baishada dera prevision de beneficis que mos ven per Baqueira Beret, pujam es ajudes sociaus que son fonamentaus ena epòca actuau que mos trapam. Cau èster ath costat des familhes pr’amor que son es qu’ac nòten en dia a dia des sues vides”,