Er Ajuntament de Naut Aran en tot seguir damb era sua linha d’ajudes as joeni de Naut Aran, destinarà un totau de 60.000 èuros en subvencions entà qu’es estudiants e es sues familhes poguen pagar-se d’ua forma mès senzilha es sòns estudis.
Es ajudes se fraccionarien en quate airaus: eth pagament de libres, d’ordenadors, dera matricula des escolans damb estudis universitaris o grads mejans e superiors que non se hèsquen ena Val d’Aran e entà corbir es despenes de mobilitat qu’aurien ath long der an es persones que non viuen en sòn municipi o comarca.
En aguest sens, entà accedir ad aguestes aportacions cau èster empadronat e víuer permanentaments en Naut Aran aumens pendent es darrèri cinc ans, auer 25 ans o mèns, e presentar es corresponentes factures entà arténher aguest benefici sociau.
En totau, un estudiant de Naut Aran que corse uns estudis superiors coma per exemple era universitat, poderie arribar a auer ua subvencion d’enquia 1000 èuros, e es que corsen cicles formatius de grad mejan o superior de formacion professionau enquia 700 èuros.
Eth baile, Cesar Ruiz-Canela, destaque que “aguestes ajudes se hèn des de hè 6 ans e èm fòrça contenti. Pensam que, d’aguesta manèra, ajudam d’ua forma importanta as nòstes familhes e as joeni enes sòns estudis.”
Eth periòde entà realizar es tramits entà obtier es subvencions finalize eth 21 de deseme deth 2020.