Er Ajuntament de Naut Aran apòste peth programa “botja-te” d’inclusion sociau e foment dera activitat fisica e mentau entara gent grana e redefinís eth concèpte en plea epòca peth coronavirus.
“Botja-te”, ère ua iniciatiua sorgida des deth pròpri consistòri damb mès de dètz ans de trajectòria en qu’es persones d’ua edat auançada auien era oportunitat de poder realizar exercici fisic, fisioteràpia o trabalhar era ment enes espacis publics deth municipi de Naut Aran regidi per ua coordinadora especifica.
Pr’amor dera actuau crisi deth coronavirus e damb era normativa en vigor que proïbís es amassades de mès de 6 persones en Catalonha, er Ajuntament de Naut Aran a decidit dar un torn de 360 grads en programa e nomentà’c “Botja-te en casa”. Ei per açò, qu’eth consistòri, aufrirà ues bosses as vesins que participauen en aguest projècte, e qu’includiràn tot tipe de materiau entà amiar a tèrme era practica des activitats, mès damb eth factor que cadun ac harà des dera sua pròpria casa.
Entre d’auti objèctes, es bosses contieràn pilòtes de diferentes grandàries e pesi, còrdes, o d’auti elements entà dinamizar es articulacions. Eth baile deth municipi, Cesar Ruiz-Canela, destaque que “er ajuntament tostemp apostarà peth present e futur des nòsti majors. Pensam que non se pòden quedar sense hèr era sua gimnastica ne exercitar era ment pes qüestions sanitàries, e auem decidit actuar entà poder aufrir-les ua alternatiua viabla”.
En totau, damb ua estimacion de 40 vesins que poderien participar, eth còst d’aguestes bosses ascendirà as 3.000 èuros. Ruiz-Canela concrète que “eth programa “botja-te” ei fòrça assentat laguens dera franja d’edat auançada en Naut Aran e s’a convertit en ua autentica referéncia”.
Entà poder coordinar tot eth projècte, era tutora telefonarà de forma personau a cadun des participaires e les explicarà es principaus directritzes qu’auràn d’amiar a tèrme entà poder desvolopar es activitats corrèctaments. Ath delà, aguesta figura, se desplaçarà tanben as sues viuendes.
Eth programa “botja-te en casa” començarà eth pròplèu 13 d’octobre e a coma objectiu principau qu’es persones majors poguen contunhar de mantier-se actives tant fisica coma mentalment, atau coma aportar-les companhia e que se poguen sénter melhor en aguesta estapa vitau.