Er Ajuntament de Naut Aran a installat 8 punts de recarrega electrica en tot eth municipi entà qu’es vesins dera Val d’Aran e toristes qu’an un veïcul d’aguestes caracteristiques poguen hèr eth sòn repostatge sense cap tipe de problèma.
En aguest sens, s’an plaçat 5 punts de recàrrega rapida enes pòbles de Salardú, Gèssa, Arties, Garòs e eth nuclèu agregat de Baqueira, e 3 punts de recàrrega semiràpida en Bagergue, Tredòs e Unha. Era diferéncia entre es dues estacions ei qu’eth subministrament rapid cargarà a ua poténcia de 50kW e poderà aumplir-se eth veïcul d’energia en un periòde entre 30 e 45 menutes, e era semiràpida ac harà a ua poténcia de 22kW damb ua durada prevista de dues a tres ores.
Era enterpresa explotadora deth servici serà era electrica Iberdrola e li calerà dar ar Ajuntament de Naut Aran un 30% dera sua facturacion annau qu’anarà dirèctaments entath romanent de tresoreria deth consistòri entà accions futures.
Eth baile deth municipi, Cesar Ruiz-Canela, destaque que “fin finau es nòsti vesins damb veïculs electrics auràn un lòc eficient en qué carregar es sòns veïculs e a un còst fòrça economic. D’aguesta forma promoiguem practiques sostenibles e suenham eth miei ambient, un des pilars fonamentaus dera Val d’Aran”.
Ath delà, tanben explique que “es toristes damb automobils electrics que mos visiten des de d’auti punts d’Espanha poderàn apropar-se ath nòste territòri damb mès facilitat pr’amor que les aufrim ua grana alternatiua entà recargar-les”.