Laguens des accions previstes en matèria sociau e joenessa, er Ajuntament de Naut Aran, a creat damb un pressupòst de 6000 èuros, un solèr de 100m2 damb ua basa de hormigon e cauchó en parc infantil de Garòs entà milhorar era experiéncia des mainades e mainatges que volguen gaudir-lo.
Er objectiu deth consistòri damb aguesta accion, ei era de protegir d’ua forma mès eficienta as petiti que utilizen aguestes installacions pr’amor que, se se queiguien en tèrra mentre utilizen era tirolina, eth tobogan o d’auti elements podien hèr-se mau.
Ath delà, e segontes explique eth baile, Cesar Ruiz-Canela, “ua des granes problematiques qu’auie aguest parc ère que, quan ploiguie, se hègen tòlhs fòrça grani e hège impossible que se podesse hèr usatge d’aguest espaci. Es mainatges non podien jogar e ère un hèt que mos calie solucionar”.
Atau madeish, des der ajuntament s’a tornat a semiar tota era zòna entà promòir es espacis verdi e contunhar damb era tendéncia aplicada pendent es darrèri mesi en qué se preten obtier era maxima distincion possibla damb eth programa de Viles Florides de Catalonha.
D’un aute costat, dauant era naua normativa emetuda des d’ager pera tarde pera Generalitat de Catalonha, s’avertís a toti es vesins deth la Val d’Aran e visitants deth territòri qu’eth parc infantil de Garòs, e dera rèsta deth municipi demoraràn dauridi des 08:00 enquias 20:00 dera tarde. A compdar d’aquera ora, era brigada deth consistòri desinfectarà aguestes installacions entà que poguen èster utilizades londeman.