Er Ajuntament de Naut Aran reclame ath Departament d’Educacion dera Generalitat de Catalonha mès professors entà poder completar era sua plantilha ena escòla Ruda de Salardú entad aguest cors escolar 2020/2021.

Eth nombre d’estudiants matriculadi en aguest centre est an passat ère de 52 damb un totau de 6 mèstres que trabalhauen a jornada complèta. De cara ar inici deth nau an escolar, s’an matriculat un totau de 70 escolans, que supause un aument d’un 35% mès respècte eth 2019, ua chifra practicaments inassumible damb era actuau plantilha damb era que se compde en aguesti moments.

Ei per açò que, des deth consistòri, se reclame qu’era escòla Ruda pogue compdar damb mès professors a jornada complèta entà poder garantir ua educacion mès eficienta e de major qualitat entàs mainatges e mainades que vagen ad aguest centre plaçat en Salardú.

Segontes eth baile der Ajuntament de Naut Aran, Cesar Ruiz-Canela, “a creishut fòrça eth nombre d’estudiants pr’amor qu’a vengut a víuer fòrça gent en nòste municipi aguest darrèr an, e, tanben, baisharàn fòrça mainatges dera escòla mairau de Tredòs. Auem de besonh mès mèstres entà assumir aguesta grana recepcion d’escolans”.

Ena escòla Ruda de Salardú s’impartissen classes as mainatges de P3 enquia 6º de primària e ei eth centre mès gran de tot eth municipi.

Atau madeish, Cesar Ruiz-Canela, a mostrat era sua preocupacion pr’amor qu’encara non a arribat materiau sanitari enes escòles entà poder començar er an damb normalitat en plea crisi deth coronavirus. En aguest sens, explique que “des deth consistòri provedim gèus idroalcohòlics e tapisi entara desinfeccion deth cauçat, mès ei competéncia dirècta deth Departament d’Educacion e ara madeish non complissen damb açò. Auem de besonh guants e mascaretes immediatament.”

Ath delà, tanben a insistit que “abans der inici deth cors escolar, se li cau facilitar a toti es professors er accès ath tèst PCR, hèt que tanpòc succedís ara madeish, aumens en nòste municipi”.