Er Ajuntament de Naut Aran a installat en un tram de 200 mètres dera carretèra C-28 que va de Gèssa enquia Salardú cinc fanaus entà aumentar era seguretat des veïculs que circulen pera via e des pedons que transiten de net.
Aguesta naua infraestructura respon ath besonh d’illuminar ua zòna qu’ère fòrça escura e que podie auer risc entara poblacion, sustot en cas des persones que crozauen aguest pas ena net en tot caminar.
En aguest sens, s’an plaçat cinc fanaus de nau mètres de nautada damb tecnologia LED entà aportar ua major visibilitat e seguretat. S’a escuelhut aguest tipe d’illuminacion pr’amor que supause un gran estauviament energetic, a major durabilitat e produsís ua lutz nitida e ludenta.
Entad aguesta accion sociau, eth consistòri a destinat un totau de 12.000 èuros. Segontes eth baile de Naut Aran, Cesar Ruiz-Canela, “ua des nòstes prioritats ei era d’aumentar era seguretat enes vies que passen pes nòsti pòbles e credem que damb aguesta accion solucionam aguesta situacion”