Dempús d’un an en quau non se podec amiar a tèrme aguest acte a causa dera crisi sanitària deth coronavirus e entà evitar possibles risqui de massificacion, era EMD d’Arties e Garòs, amassa damb aguesta associacion, an decidit qu’aguesta dimenjada pogue amiar-se a tèrme de nau aguest tradicionau acte de Nadau.
Des dera organizacion der eveniment se demane a toti es assistents que respècten es actuaus mesures de protocòu en tot hèr especiau incidéncia en mantier era distància de seguretat e portar era masqueta metuda en tot moment.
Er acte ei previst entad aguest dissabte dia 4 de deseme a compdar des 17:30 dera tarde quan començarà a èster escur en Arties entà qu’eth cèu pogue èster illuminat damb es classics fanaus. Es vesins qu’ac desiren, pòden passar a remassar-les ena botiga deth Bòsc enquia menutes abans que comence er enlumenat oficiau pera tarde.
Era bailessa dera EMD d’Arties e Garòs, Lina Fanlo, destaque que “aguest ei un des actes mès polidi qu’auem en nòste pòble e non mos ac volíem tornar a pèrder. Per sòrt, era situacion sanitària actuau mos ac permet, encara que demanaram as vesins e visitants que complisquen es nòrmes de distància entre persones e sustot era masqueta metuda en tot moment entà evitar quinsevolh tipe de risc”.
Er enlumenat der arbe de Nadau s’harà coma ei d’abituda ena Plaça Ortau d’Arties damb er objectiu de dar era benvenguda ad aguest periòde plen d’alegria e d’illusion.