Atau coma s’acordèc ena darrèra assemblada dera associacion Viles Termals de Catalunya, aguest següent desplaçament a estat entara Val d’Aran a on an visitat es municipis de Naut Aran e Les. Sustot çò que se destaque ei era zòna de Naut Aran pr’amor qu’a dus espacis termaus qu’an estat visitadi pera associacion coma son es Banhs d’Arties e es Banhs de Tredòs.
En aguest sens, era visita comencèc peth maitin damb ua rota pes carrèrs dera poblacion d’Arties, peth sòn casc antic e es sòns cornèrs mès atractius. Rebrembam qu’aguesta localitat forme part dera distincion Viles Florides e a estat recentaments considerat coma un des Pòbles mès Polidi d’Espanha.
Dempús d’aguest inici, tota era comitiva completada per representants de Naut Aran, damb eth sòn baile César Ruiz-Canela ath capdauant, se dirigic tàs aigües termaus d’Arties a on s’expliquèc era gran importància e es proprietats damb es que compde aguest espectacular emplaçament. Es membres d’aguesta organizacion demorèren meravelhadi deth contrast de poder gaudir des aigües mineromedicinaus a ua baisha temperatura exteriora fusionat damb era preséncia dera nhèu.
En finalizar aguesta prumèra part dera travessia, seguiren en pròpri municipi damb un trajècte en mòtos de nhèu pes montanhes de Naut Aran entà dempús baishar tàs Banhs de Tredòs, eth balneari mès naut d’Euròpa tota e en que poderen gustar productes dera gastronomia locau.
Eth baile de Naut Aran, César Ruiz-Canela destaque que “eth termalisme ei ua grana oportunitat entà promòir eth nòste territòri pr’amor que mos pòt atrèir un tipe de torisme totauments diferent ath qu’èm acostumadi. Cau estudiar tostemp totes es alternatiues entà fomentar un municipi sostenible e adaptat as besonhs dera S.XXI. Èm fòrça contenti de formar part dera associacion Viles Termals de Catalunya”.
Eth plen dera associacion de Viles Termals de Catalunya se hèc en Les, un aute des pòbles que se junhec ath grop ath madeish viatge que Naut Aran, e en que se debatec sus era importància e es beneficis des aigües termaus entà pacients damb COVID persistent. Sus açò, cau destacar que s’a hèt un estudi damb pacients der Espitau deth Mar de Barcelona que verificarie aguest hèt damb uns grani resultats. Atau madeish, tanben se visitèren es termes d’aguesta madeisha localitat.