Era Entitat Municipau Descentralizada d’Arties e Garòs a installat pendent aguesti dies desfibrilladors extèrns automatics (DEA) damb er objectiu d’esdevier localitats cardioprotegides e qu’es vesins d’aguesti lòcs poguen emplegar-les eth cas que sigue estrictaments de besonh.
En aguest sens, ena poblacion d’Arties, s’a plaçat aguest sistèma ena pòrta deth pròpri consistòri e en Garòs en bar ‘Era Sala’. Era designacion d’aguestes dues zònes respon a un caractèr estrategic pr’amor que son dus des espacis mès concorrudi as qu’accedissen es vesins atau coma es visitants que s’apròpen ada eres.
Era bailessa d’Arties e Garòs, Lina Fanlo, destaque que “auem decidit plaçar dus sistèmes DEA enes nòsti pòbles en prumèr lòc per ua recomanacion exprèssa per part deth còs de Pompièrs e Emergéncies pr’amor que mos expliquèren qu’ère convenient que l’auéssem e, en dusau lòc, pr’amor qu’era gent deth pòble ac pogue utilizar en cas d’ua extrèma urgéncia”.
Entà considerar-se ua localitat cardioprotegida, ath delà dera installacion des equipes DEA, s’a d’amiar a tèrme ua formacion damb es vesins entà qu’agen coneishements tecnics entath sòn usatge. Sus açò, era formacion se harà eth dia 11 d’octobre en Arties ena sala der ajuntament e eth 21 d’octobre en bar ‘Era Sala’ de Garòs. Era mantenença der aparelh serà costejat pera pròpria EMD.