Dempús des reivindicacions hètes per Ajuntament de Naut Aran ath Departament d’Educacion dera Generalitat de Catalonha, era institucion catalana a decidit autrejar ara escòla Ruda de Salardú un professor mès entath cors educatiu 2020/2021.

Eth plantejament elaborat peth consistòri alertaue qu’eth complèx non podie mantier un volum de 70 escolans damb unicaments 6 professors, pr’amor qu’auie aumentat eth nombre de matriculacions en un 35% damb era madeisha plantilha entà aguest nau an.

Er ajuntament, a mostrat era sua satisfaccion deuant d’aguesta notícia pr’amor que permeterà as estudiants d’aguest centre de Naut Aran auer ua educacion mès eficienta e productiva. Eth baile, Cesar Ruiz-Canela, destaque que “ei ua grana notícia poder aumentar era plantilha damb un mèstre mès e atau m’ac a hèt a saber eth claustre de professors”. Encara atau, remèrque que “auem artenhut un gran pas, mès credem qu’auem de besonh encara bèth refòrç mès per se i auesse bèra baisha que se podesse produsir era plea crisi deth coronavirus”.

Atau madeish, Ruiz-Canela, a afirmat que “se mos a notificat que pendent aguesti pròplèus dies se realizaràn es pròves de tèst serologics as docents des centres de Naut Aran e açò mos tranquillize pr’amor que poderam garantir un inici de cors segur”.

Per contra, rebrembe que “contunham en tot demorar qu’eth Departament d’Educacion mos envie eth materiau sanitari adequat entà previer quinsevolh focus d’infeccion de coronavirus. Nosati dejà auem proporcionat tapisi entath cauçat e gèls idroalcoholics, mès non ei sufisent”.