Aguesta setmana an finalizat es òbres de reabilitacion deth parcatge que i a ena entrada deth pòble de Gèssa, en Naut Aran, e que portauen en tot executar-se des deth passat mes de junh. Arrebrembam qu’er anterior projècte ère mau efectuat e que i auie risc d’esbaussament d’aguesta estructura. Ei per açò, qu’era Entitat Municipau Descentralizada, a auut de centrar es sòns esfòrci a rehèr tota era zòna de parcatge.
Er Ajuntament de Naut Aran aprovèc per urgéncia mesi endarrèr era realizacion d’aguestes òbres d’apraiament damb un còst totau de 195.000 èuros. Aguestes includien refortilhar es murs de 4 mètres de nautada e ua extension de 40 mètres lineaus, pr’amor que s’auien detectat ua sèrie de henerècles e petiti esbaussaments ena zòna e podie supausar un risc entàs pedons e es veïculs que se trapèssen aparcadi.
Segontes Marcos Amiell, baile de Gèssa, “aguestes òbres èren fonamentaus e non se podien retardar ne ua menuta. Auem pogut solucionar es errors estructuraus e, actuaument, podem aufrir un parcatge segur as nòsti vesins e persones que mos visiten”.
Atau madeish, ahig que “mos calie actuar damb celeritat pr’amor que quan èm en plea sason d’iuèrn, eth municipi de Naut Aran arrecep era visita de fòrça toristes e non podíem permeter-mos deishar d’auer un parcatge d’aguestes caracteristiques”.
Aguesta zòna de parcatge compde damb un totau de 49 places de parcatge, dues d’eres dedicades entà persones damb andicapat, e dues places apart destinades peth nau punt de recarga electrica.