Eth Freeride World Tour inície ua naua sason e ac tornarà a hèr coma ja succedie est an passat ena estacion d’esquí aranesa de Baqueira Beret. Aguest eveniment internacionau atrè a milenats de persones en complèx plaçat ena Val d’Aran que se placen ena part baisha deth mitic Tuc deth Bacivèr qu’ei eth lòc escuelhut tà qu’es melhors freeriders deth mon baishen en tot realizar es sòns melhors trucs e acrobàcies entà arténher era glòria ena Val d’Aran.
Deman madeish ei previst que comencen es actes oficiaus ath torn d’aguesta hèsta esportiua damb era presentacion dera pròva que repetís sedença e serà ena Plaça dera Querimònia de Salardú as 18:00 dera tarde. En era, s’haràn es parlaments des desparièrs representants institucionaus deth territòri, atau coma un petit briefing explicatiu en tot descorbir es claus d’aguesta espectaculara descenuda. Pr’amor des condicions meteorologiques previstes ath long d’aguestes jornades, era organizacion deth FWT a decidit qu’era competicion deth FWT e era deth Freeride Junior World Tour (FJWT) siguen eth dimenge peth maitin e ath meddia. Era prevision iniciau indicaue que siguesse eth dissabte quan es corredors hèssen es sues baishades, mès eth risc d’ua climatología advèrsa e entà garantir era seguretat des esportistes s’a prenut aguesta determinacion.
Destaque especiuaments era preséncia des aranesi Aymar Navarro, Wildcard per Baqueira Beret, e Abel Moga, qu’auec ua sensacionau pròva est an passat en aguest madeish Tuc deth Bacivèr. Andús riders aueren sòrt disparièra pr’amor que Navarro prepausèc ua des sues tradicionaus linhes agressives que desafortunadament perdec eth contròl des sòns esquís e impactèc a grana velocitat contra eth fèrm dera estacion. Pera sua part, Moga, vò tornar a demostrar en mon qu’eth ‘rookie’ der an passat s’a assolidat e qu’era sua dusau posicion ena anteriora edicion d’aguesta competicion non siguec per edart.
Er Ajuntament de Naut Aran collabòre damb era organizacion der eveniment e aufrís ua subvencion de 50.000 èuros. Eth baile municipau, César Ruiz-Canela, destaque que “eth Freeride World Tour ei un eveniment incredible, espectacular e unic que se ve en tot eth mon per streaming e qu’ac gaudissen centeats de milenats de persones pendent es setmanes següentes. Sabem que pòt èster un gran producte de promocion toristica entà Naut Aran e apostam damb claretat peth futur d’aguest espòrt.”
Sus eth Tuc de Bacivèr
Era competicion aurà lòc ena cara noroèst deth Tuc de Bacivèr, damb ua nautada en cim de 2644 m e un desnivèu de 385 m enquiara arribada. Eth terren ei extrèmaments arribent damb formacions rocoses que combinen salients damb ‘couloirs’ que permetissen grana varietat de linhes e trucs.
Naut Aran patrocinador oficiau deth Freeride Junior World Tour
Dera madeisha manèra, parallèlaments ath FWT, tanben s’harà eth Freeride Junior World Tour a on participaràn 90 juniors entre aranesi e riders vengudi d’auti territòris a gaudir dera competicion de mès naut nivèu entre es joeni en aguesta disciplina.
En aguest cas, era zòna escuelhuda entad aguesta pròva ei era deth ‘Teso dera Mina’ en ua descenuda de 150 mètres de desnivèu que substituís ath classic itinerari deth ‘Escornacrabes’, lòc en que se hèc era pròva est an passat. Deth FJWT destaque qu’aurà tres categories ena disciplina d’esquí que son es d’U14, U16 e U18. Enes casi dera descenuda damb esquí entà hemnes, surf de nhèu entà hemnes e surf de nhèu entà òmes, sonque se compdarà damb es categories U14 e U18.
Naut Aran ei eth patrocinador principau d’aguest eveniment damb ua dotacion totau de 8.000 èuros e compdarà damb representacion laguens d’aguesta competicion pr’amor qu’aurà tres vesins deth municipi en esquí d’òmes e dues hemnes en surf de nhèu. Un d’aguesti, que concorrerà ena categoria d’U16, Laurens Jaquet, explique que “ei tot un aunor poder auer ua pròva d’aguestes caracteristiques de nivèu mondiau ena nòsta pròpria casa. Aciu es riders locaus podem auer un auantatge e ei que mos coneishem eth terren ath pè dera letra pr’amor que gaudim de Baqueira Beret cada viatge que podem. Nosati tanben ac notam quan anam tà Tignes, Verbier o Ordino-Arcalís e ara podem gaudir nosati de córrer en casa”.
Ei previst qu’era pròva age eth sòn inici eth dimenge ath torn des 10:00 deth maitin damb eth liurament de prèmis as 15:30 segontes informen des dera organizacion deth Freeride World Tour
Union dera Federacion Internacionau d’Esquí e Freeride World Tour
Mejançant era fusion deth FWT, FIS englobarà totes es disciplines der esquí e eth surf de nhèu, en tot dotar-les de major fòrça e poténcia entà desvolopar-se ena scèna globau.
FWT contunharà de dirigir era operacion quotidiana deth Tour, e seguirà comprometut damb es sòns valors essenciaus de seguretat, rendiment, responsabilitat, inclusion e diversion. De hèt, eth format de competicion, qu’aufrís un camin just entà toti es atletes -des des eveniments de basa as d’elèit- e eth sistèma de puntuacion, contunhen d’èster es madeishi. FIS se centrarà en marqueting e FWT de transméter era estructura de d’auti espòrts Olimpics consagradi.