Es vesins dera Val d’Aran e d’auti visitants poderàn gaudir d’un nau atractiu culturau e patrimoniau gràcies a ua accion conjunta der Ajuntament de Naut Aran, Conselh Generau d’Aran, Deputacion de Lhèida e era Generalitat de Catalonha, entà poder hèr visitable eth campanau dera glèisa de Sant Andrèu de Salardú.
Er objectiu d’aguesti trabalhs a estat dotar ath campanau d’ues condicions d’accès segur, pr’amor qu’anterioraments eth sòn estat ère fòrça perilhós. Es accions que s’an amiat a tèrme an cercat respectar era estructura d’òbra e, sustot, méter era valor es estructures de husta d’aguest campanau, que son d’un naut interès arquitectonic. En aguest sens, s’a plaçat ua dobla planta d’escalèrs entàs que, es que volguen apropar-se, poguen gaudir de tot er èish d’auviatge que represente aguest temple, atau coma d’ues vistes espectaculares de diuèrses zònes de Naut Aran.
Eth baile municipau, César Ruiz-Canela, explique que “èm fòrça contenti de veir coma aguesta accion culturau ara fin ei acabada. Gràcies a ua accion conjunta per diuèrses institucions poiram guanhar ua naua vision deth nòste patrimòni coma ei en aguesta escadença era glèisa de Sant Andrèu de Salardú. Jo ja l’è pogut estrear e certament se pòden contemplar ues vistes espectaculars e ua qualitat artistica excellenta damb toti es mecanismes que hèn a tocar es campanes”.
Eth campanau dera glèisa Santa Andrèu serà visitable entath public generau, en grops redusidi e guidadi en ua activitat aufrida per Musèus dera Val d’Aran. Aguesta infrastructura a un gran interès arquitectonic e istoric, non sonque pera òbra de fabrica, mès tanben, pes estructures interiores de husta, ath delà d’auti elements de gran interès coma eth sòn mecanisme deth relòtge deth sègle XVIII o es madeishes campanes.
Eth còst totau d’aguesta accion a ascendit enquias 174.838,66 èuros.