Dempús de diuèrsi mesi de trabalh, an finalizat es òbres qu’auie projectat era EMD de Bagergue qu’afectaue eth carrèr Lagoarto, carrèr Pontet e era zòna dera plaça deth Musèu “Eth Corrau”. En aguest sens, aguestes accions s’an amiat a tèrme entà separar es aigües pluviaus des residuaus, atau coma milhorar eth paviment pr’amor qu’èren un des pògui lòcs d’aguesta localitat que mancaue entà renauir eth solèr.
Sus açò, er empeirat s’a hèt damb granit entà que sigue mès resistent e entà suportar milhor es condicions climatologiques cambiantes de Bagergue. Cau rebrembar qu’aguest pòble de Naut Aran, ei eth mès de naut de tot eth territòri aranés e, per tant, se ve mès afectat pes nheuades peth hèt que se tròbe a 1419 mètres, fòrça pròplèu ara còta mès baisha dera estacion d’esquí de Baqueira Beret.
Eth pressupòst totau dera accion a ascendit a 110.000 èuros, qu’a finançat integraments er Ajuntament de Naut Aran ara demora d’arrecéber ua subvencion deth Plan Unic d’Òbres e Servicis de Catalonha per valor de 25.000 èuros entà amiar a tèrme aguestes òbres concrètes. Era redaccion deth projècte, atau coma era licitacion e era substitucion de cablejat electric an anat a cargue dera pròpria Entitat Municipau Descentralizada.
Eth baile de Naut Aran, César Ruiz-Canela, destaque que “nosati coma ajuntament tostemp ajudam a totes es EMD’s e, des de Bagergue, mos demanèren executar aguesta accion e credem que damb aguesta òbra se finalizen toti es carrèrs a nivèu de servicis, pavimentacion e separacion d’aigües. Aguesta localitat se tròbe actuauments en ues condicions immillorables”.
Ath sòn torn, eth baile pedani, Marc Tarrau, concrète que “ei fòrça important entà nosati era separacion d’aigües entà poder hèr era futura connexion des nòstes aigües residuaus enquiara depuradora generau de Naut Aran plaçada ena poblacion de Garòs. Volem arregraïr ath consistòri era sua ajuda e collaboracion entà amiar a tèrme aguestes accions”.
Es òbres s’an executat en un tèrme de sies mesi pr’amor que, eth mes d’agost, aguestes s’arturèren entà non afectar era sason toristica ena zòna.