Er Ajuntament de Naut Aran realizarà reformes ena Sala Polivalenta de Salardú per un valor estimat de 100.000 èuros. Aguestes accions contemplen un remodelament des actuaus vestiaris e lavabos, atau coma cambiar eth paviment dera pista poliesportiva e traçar naues linhes de jòc.
Sus eth prumèr ahèr, s’a detectat qu’es vestiaris auien de besonh un renauiment integrau pr’amor qu’auien demorat obsolets, tant a nivèu d’espaci coma de materiaus. Ei per açò que s’harà ua accion entà poder adaptar e unificar d’ua manèra mès eficienta toti es servicis que s’amien a tèrme laguens d’aguesta installacion. Eth tèrme d’execucion d’aguesta accion començarà a compdar deth mes de seteme, just dempús dera sason de piscina en ostieu.
Ath delà, per çò que hè as lavabos e sanitaris, se cambiarà tot eth tèrra e eth tet, atau coma pintar pòrtes e parets. En sòn interior, se transformarà tot er espaci, en tot auer equipaments fòrça mès modèrni e adaptadi as besonhs des usatgèrs. D’un aute costat, se crearà un nau lavabo public entàs hemnes pr’amor qu’ère fòrça demandat peth temps de demora que se generaue. Era prevision de realizacion d’aguestes òbres ei a compdar deth mes de mai.
Fin finau, per çò que hè ara pista poliesportiva, se repintarà eth paviment completament, en tot dar-li ua naua vision e en tot milhorar era sua imatge perqué hège fòrça ans que non se trabalhaue en era. Dera madeisha manèra, se traçaràn es linhes de jòc entà qu’es vesins e visitants poguen practicar es espòrts de fotbòl sala, basquetbòl o andbòl entre d’auti. Aguesta darrèra accion s’harie abans der ostieu.
Eth baile de Naut Aran, César Ruiz-Canela, destaque que “aguestes accions qu’amiaram a tèrme es pròplèus mesi èren fòrça de besonh pr’amor que non disposàuem d’uns espacis adaptadi as besonhs des nòsti usatgèrs. Damb aguesti cambis demoram poder melhorar era experiéncia des nòsti vesins e visitants e dar un plus de modernitat a tota era installacion.”
Est an passat ja s’amièren a tèrme ua sèria d’accions coma era impermeabilizacion deth tet dera Sala Polivalenta, eth cambiament de hièstres o eth repintat interior des parets.