Er Ajuntament de Naut Aran, en tot apostar entà melhorar era vida des vesins deth municipi, bastirà en ostieu un Pump Track en Arties entà aportar mès alternatives d’òci as joeni deth territòri.
Dempús dera sua aprovacion iniciau en Plen der ajuntament mesi endarrèr, era Comission d’Urbanisme dera Val d’Aran aprovèc aguest diuendres de forma definitiva aguest projècte avalorat en 100.000 èuros. Era finca, qu’a ua superfície de 4656 m2 des quaus 950m2 se destinaràn ath bastiment dera pista, se plaçarà ena zòna colindant ara centrau idroelectrica dera poblacion d’Arties.
Era sua licitacion ei prevista entara epòca d’iuèrn e er inici des òbres de bastiment d’aguest espaci començarien entrada era primauèra quan es condicions climatològiques ac permetessen. D’aguesta forma, er objectiu deth consistòri ei qu’aguest nau equipament sociau pogue èster premanit entà èster estreat en ostieu.
Eth Pump Track d’Arties aurie rampes entà hèr pujades e baishades, atau coma petiti obstacles que sortejar o sautar en tot aufrir atau ua grana experiéncia as usatgèrs que volguen utilizar aguestes futures installacions.
Eth baile de Naut Aran, Cesar Ruiz-Canela, destaque que “eth Pump Track ei un projècte qu’auem enfocat sustot entàs joeni deth municipi, entà que poguen gaudir der espòrt e des abits saludables que produsís hè’c”.
Ath delà, ahig que, “èm fòrça contenti qu’era Comission d’Urbanisme dera Val d’Aran mos age balhat era autorizacion pr’amor qu’aguest nau equipament darà ua alternatiua sociau mès entath municipi”.