Er Ajuntament de Naut Aran a començat es òbres en carrèr Major dera poblacion de Salardú damb era finalitat de milhorar eth sistèma d’aigües e eth manteniment d’aguesta via entà un major benefici des vesins dera zòna.
En aguest sens, se destinaràn ath torn de 107.000 èuros en ues actuacions que s’extieràn en ua superfície de 414 mètres quarrats pera via principau, e es adjacentes ad aguesta. Un des aspèctes mès importants d’aguesta accion serà era separacion des aigües residuaus des pluviaus mejançant dus tuèus qu’auràn recorreguts diferents. Dera madeisha manèra, tanben se contemple milhorar eth paviment damb ua capa de granit que serà similar ath que i a ena rèsta deth casc ancian de Salardú.
Eth baile der Ajuntament de Naut Aran, César Ruiz-Canela, explique que “son ues òbres de besonh pr’amor qu’era separacion d’aigües ei ua prioritat entà poder milhorar en eficiéncia a nivèu poblacionau”.
Es òbres finalizarien en un tèrme maximom de quate mesi en foncion des condicions climatologiques dera zòna.