Eth Plen der Ajuntament de Naut Aran a aprovat aué ua modificacion pressupostària de 325.000 èuros qu’includís en era, ua aportacion extraordinària ar AMPA de Salardú e d’Arties entà que poguen disposar de mès monitors de minjador sense auer d’abonar cap quantitat suplementaria es pairs e mairs. En aguest sens, era de Salardú arreceberà un totau de 10.000 èuros, pes 5.000 dera d’Arties.
Des deth consistòri, s’arrebrembe que, actuauments, se da 70 èuros per mainatge e 7.800 èuros ar AMPA en Salardú, 3.000 en Arties e 1.000 en Gessa. Per tant, er aument ena majoria de casi ei notòri pr’amor qu’era aportacion ei mès deth doble dera iniciau. Eth baile de Naut Aran, César Ruiz-Canela, destaque que “en epòca de Covid volem ajudar ath maximom as familhes deth nòste municipi, e, mòstra d’açò, son aguestes ajudes extraordinàries qu’aufrim en sector educatiu que segur seràn fòrça ben arrecebudes”.
Ath delà, laguens dera pròpria modificacion pressupostària de 325.000 èuros, ei contemplat un convèni damb eth Conselh Generau d’Aran per valor de 25.000 èuros entara reforma der accès ath campanau de Salardú entà hè’c atau visitable. Atau madeish, se destinaràn 40.000 èuros entà pagar diuèrses accions que s’an amiat a tèrme en nau gimnàs de Naut Aran plaçat en Gessa. Fin finau, tanben i a ua auta partida que supère es 200.000 èuros entara pavimentación d’un tram d’Aiguamòg.
En d’auti ahèrs deth plen, s’a confirmat qu’era hèira de Salardú s’harà en lòc a on istoricaments s’amie a tèrme encara que damb era modificacion que non i aurà esdejoar popular entà evitar massificacions de vesins e era intencion d’incorporar ara plantilha fixa deth consistòri a ua persona que coordine activitats restacades damb eth municipi abans der iuèrn.