Eth Plen der Ajuntament de Naut Aran a aprovat aguest maitin ena sua session ordinària per unanimitat era bonificacion der impòst de bens immòbles entàs vesins empadronadi de Naut Aran. Es casi que se contemplen laguens d’aguest ajut son es que compden damb ua prumèra viuenda, bòrdes e solars que i a en casc urban e non trèn profitament, bars, restaurans e hotèls que daurissen un minim de 150 dies ar an, bòrdes agropecuàries e cabanes e bòrdes de terren rustic que non an activitat economica. Per exemple, se un vesin en 2023 auec de pagar un totau de 200 € per IBI e en 2024, 240 èuros, eth consistòri se harie cargue d’aquera diferéncia de 40 èuros entre aguesti dus ans.
Eth baile der Ajuntament de Naut Aran, César Ruiz-Canela, explique que “pensam qu’auiem d’ajudar as nòsti vesins en tot bonificar er IBI a toti aqueri bens immòbles que non les generen cap tipe de rendiment economic, ei a díder, que sigue era sua prumèra residéncia, o qu’agen ua bòrda o ua explotacion agropecuària entre d’autes. Ac notaràn ena sua factura annau pr’amor que les ajudaram ena diferéncia deth còst der IBI deth 2024 respècte eth 2023.”
Ath delà, entre d’auti ahèrs tanben s’a aprovat ua modificacion pressupostària per valor de 895.000€ enes que i destaquen 780.000 èuros entath bastiment dera centrau termica de Biomassa entà crear eth district heating de Naut Aran. Tanben, entre d’autes accions se destinaràn 50.000 èuros entara insonorizacion deth poliesportiu, 20.000 entà crear ua naua via herrada o 127.000 èuros entara reforma dera glèisa Sant Joan d’Arties.
D’un aute costat, s’an aprovat es critèris d’adjudicacion entara concession des abitatges de loguèr assequible que se bastiràn en municipi enes pròplèu mesi coma son era viuenda de Garòs, dejà en òbres, era futura viuenda de Tredòs o es dera plaça dera Pica de Salardú.