Eth Plen der Ajuntament de Naut Aran a aprovat aguest maitin en session ordinària damb es vòts en favor de Convergéncia Aranesa e es abstencions d’Unitat d’Aran-PSC e d’Aran Amassa era qu’ei era modificacion pressupostària mès grana de tota era istòria d’aguest consistòri.
En aguest sens, era quantitat totau d’aguest aument se place en 1.872.000 e s’obten, en part, gràcies ara grana pujada deth canon de Baqueira. Enes pressupòsti iniciaus der an 2022, i auie ua prevision d’ingrès deth canon per part dera estacion d’esquí de Baqueira Beret en ajuntament de 1.030.000 èuros. Un viatge finalizat er exercici economic deth complèxe e barrades totes es chifres, eth totau d’ingrèssi peth canon ei de 2.065.000 èuros, per çò que s’a somat d’auti 1.035.000 euros extra as que dejà i auie anterioraments.
Coma resultat dirècte d’aguesta naua aportacion, ua des granes beneficiades seràn es Entitats Municipaus Descentralizades que se repartiràn 541.000 èuros mès des que ja auien assignadi anterioraments en pressupòst iniciau (460.000 èuros). Ath delà, tanben s’agranís eth pressupòst destinat ar ampliament dera escòla Ruda de Salardú, que passarà des 100.000 èuros iniciaus as 500.000 totaus damb era modificacion.
D’un aute biais, er Ajuntament de Naut Aran a creat ua partida especifica de 700.000 èuros d’inversion entath bastiment de sies abitatges sociaus ena zòna dera Plaça dera Pica de Salardú. Eth projècte executiu se hè en aguesti moments e, un viatge finalize, se treirà a licitacion entà que pogue èster ua realitat çò de mès lèu possible.
Eth baile municipau, César Ruiz-Canela, afirme que “pendent aguesti darrèri ans, era nòsta equipa de govèrn a amiat a tèrme granes inversions destinades entà toti es collectius. Ara auem previst eth bastiment d’abitatges sociaus e er ampliament dera escòla que son dues accions fòrça importants que cambiaràn per complèt eth futur deth nòste parçan. Èm fòrça erosi de veir qu’aguest consistòri pòt afrontar aguestes accions e ei completaments sanejat.”
Eth romanent de tresoreria actuau damb eth que compde eth consistòri se trape en 233.000 èuros e servirà entà amiar a tèrme accions d’urgéncia o futures inversions en cas que sigue de besonh.