Aguest maitin s’a amiat a tèrme eth plen der Ajuntament de Naut Aran en que, entre auti ahèrs, s’a aprovat ua modificacion de pressupòst per valor de 125.000 èuros damb es vòts a favor de Convergéncia Aranesa e Unitat d’Aran e era abstencion deth grop d’Aran Amassa.
En aguest sens, se destinaràn 55.000 èuros ar ampliament de diuèrsi des parcs infantils deth municipi. Concrètaments, se realizaràn accions ena zòna dera plaça Fòrum de Baqueira, tanben en parc a on èren plaçadi es ancians ossi d’Arties e en parc d’entrada ara poblacion d’Unha. Ath delà, tanben se destinaràn 5.000 èuros entath transpòrt des estudiants de Naut Aran pendent era epòca escolara entà que poguen realizar activitats ena nhèu coma esquí de hons.
D’un aute costat, tanben i a d’autes partides de manteniment coma per exemple apraiament de veïculs municipaus, combustibles e carburants o nau mobiliari entath pròpri consistòri o era Bibliotèca de Naut Aran.
Eth baile de Naut Aran, César Ruiz-Canela, destaque que “damb aguest paquet d’accions mos prepausam melhorar diuèrsi espacis d’usatge public coma pòden èster es parcs infantils. A estat tostemp ua prioritat aguest sector dera poblacion entà nosati e ac auem demostrat ath long des ans damb tota ua sèria d’accions”.
D’un aute biais, s’a aprovat damb es vòts a favor de Convergéncia Aranesa e Unitat d’Aran e era negativa d’Aran Amassa, era delegacion dera gestion forestau ath Conselh Generau d’Aran des montanhes qu’apartien ath tèrme de Salardú. Era rèsta de pedanies deth municipi auràn era sua pròpria capacitat de decision respècte aguest ahèr.
Fin finau, tanben s’a aprovat eth convèni entre eth Conselh Generau e er Ajuntament de Naut Aran sus eth projècte de tecnica compartida entà aguest 2022-2023.