Eth Plen der Ajuntament de Naut Aran aprovèc dies endarrèr eth pressupòst mès naut dera sua istòria en tot passar de 7.500.000 èuros as 8.900.000 èuros. Açò supause un 18,67% mès gràcies as ingrèssi dera taxa toristica, era prevision d’ingrèssi deth canon de Baqueira Beret e era pujada der IBI qu’afectarà as persones que non agen ua prumèra residéncia en municipi.
Aguesti son es pressupòsti mès sociaus e ambiciosi jamès aprovadi pr’amor que se destinaràn ath torn de 350.000 èuros as familhes e associacions dera zòna. En destaque un totau de 224.000 èuros as escòles de Naut Aran en ajudes dirèctes a familhes, 121.000 en bonificacions a nivèu d’impòsti o 65.000 èuros as jubilats e majors de 65 ans. Ath delà, tanben i a uns 160.000 èuros en çò que tanh a subvencions per accions esportiues, 90.000 a cultura o 61.500 respècte promocion economica. Tanben i a ua pujada deth 10% en çò que tanh as transferéncies per limpiesa de nhèu entàs Entitats Municipaus Descentralizades (EMD) damb un totau de 170.000 èuros e ua partida de 30.000 entàs pòbles tàs hèstes majors.
Eth baile de Naut Aran, César Ruiz-Canela, destaque que “aguesti pressupòsti responen a un ahèr sociau perqué pensam prumèr de tot en benèster des nòsti vesins. Eth clar reflèxe ei qu’es EMD passen d’auer 165 èuros per abitant a 180 èuros per abitant. Aguesta pujada ei molt grana e segur que se notarà entà qu’es pòbles poguen suenhar mès es servicis basics des persones”.
Sus es inversions mès importants que s’amiaràn a tèrme gràcies ad aguest pressupòst se soslinhen es òbres der hilat de calor, es accions entà reformar eth pis sociau de Garòs, eth bastiment des viuendes ena plaça dera Pica de Salardú o era partida entara viuenda sociau de Tredòs.