Eth Plen der Ajuntament de Naut Aran a aprovat aguest maitin damb es vòts a favor de Convergéncia Aranesa e es abstencion de Unitat d’Aran e Aran Amassa eth que serà eth pressupòst mès naut de tota era sua istòria en tot compdar damb un totau de 7.500.000 èuros que supausarà un 7% mès respècte ath pressupòst der an passat que tanben ère eth maximom artenhut jamès.
En aguest sens, aguesta aportacion s’a obtengut gràcies as bones chifres der an passat deth cànon de Baqueira e qu’enguan hèn a demorar ua prevision de 1.400.000 èuros que se repartiràn entre era poblacion de Salardú en pròpri consistòri e ena rèsta d’Entitats Municipaus Descentralizades que compden damb eth convèni damb eth complèx.
Entre es accions mès destacades d’aguest nau pressupòst de 2023, i subergessen es accions sociaus destinades entàs majors de 65 ans deth municipi. Sus açò, er Ajuntament de Naut Aran destinarà ua partida de 100.000 èuros a dues accions: era prumèra, enfocada entàs majors de 75 ans, serà er aufriment d’un relòtge GPS que permeterà as familhars dera gent grana deth territòri saber en tot moment es constants vitaus e ubicacion dera persona, e en cas d’èster de besonh, que poguen telefonar ath telefòn 112 damb ua major celeritat.
D’un aute costat, era dusau accion, serà era d’aufrir 1.000 èuros, annaus, a toti aqueri vesins majors de 65 ans que agen un ingrés menor de 1.000 èuros mensuaus ena sua pension o un valor monetari en banc inferior as 10.000 èuros. En cas que siguen ua parèlha, era regla s’aplique dera madeisha forma en tot doblar es quantitats: mens de 2.000 èuros mensuaus entre es dus e mens de 20.000 èuros en banc coma maximom.
Eth baile der Ajuntament de Naut Aran, César Ruiz-Canela, destaque que “era gent grana deth municipi tostemp a estat ua prioritat entà nosati. Sabem que fòrça gent li còste arribar a darreries de mès en cas de persones dera tresau edat e volem aufrir-les aguest ajut d’entre 80 e 100 èuros ath mes entà que poguen hèr front as còsti dera vida coma era pujada dera lum o eth gas.”
Ath delà, s’aufrissen coma ei d’abituda es 165 èuros per abitant a totes es Entitats Municipaus Descentralizades per un valor totau de 220.000 èuros. En d’auti aspèctes deth pressupòst, se contemple eth bastiment de naues vies d’escalada entà acuélher pròves esportives en futur, era creacion d’un club ciclista entà mainadèra de 8 a 10 ans o ua subvencion de 35.000 èuros entà Baqueira Beret entara formacion de naues rotes de BTT entath ostieu un viatge vist eth succès d’aguest prumèr an.
En d’auti ahèrs, Ruiz-Canela, explique que “eth romanent de tresaureria l’emplegaram enes pròplèu mesi entà bastir es sies pisi de loguèr sociau ena zòna dera Plaça dera Pica de Salardú e eth macro complèx de Naut Aran que demoram pogue començar a executar-se ena sua prumèra fasa en ath long deth pròplèu an.”