Er Ajuntament de Naut Aran a aprovat aué ena sua session plenària per unanimitat cambiar es nòrmes subsidiàries dera zòna de Salardú entara creacion deth gran complèxe de 4500 mètres quarrats que comprenerie un nau parcatge soterrani, atau coma ua zòna d’abitatges sociaus e d’auti equipaments municipaus.
Sus açò, cau destacar que s’a prepausat aumentar eth marge entara creacion de mès granes e milhores places de parcatge, atau coma ua reduccion der arribent dera principau rampa dera entrada. En totau, segontes estudis der avantprojècte deth consistòri poderie auer-i ath torn de 290 naues places de parcatge.
Ath delà, un des elements mès importanti per çò que hè ad aguesta futurible grana accion serie era creacion de 30 abitatges tuteladi e un centre de dia entara gent grana de Naut Aran. Sus aguest ahèr, eth baile de Naut Aran, César Ruiz-Canela, explique que “ua des nòstes prioritats pendent toti aguesti ans a estat era creacion d’abitatge sociau. Auem venut diuèrses parcèles en zònes coma Baqueira que mos a proporcionat auer ath torn de 3 milions d’èuros que les utilizaram justaments entad aguesta accion.”
Eth pressupòst totau, segontes alcaldia, poderie arribar entàs 9-10 milions d’èuros e trigarie ath torn de 4 ans a desvolopar-se completaments pr’amor des condicions climatològiques iuernaus que non permeterien trabalhar as obrèrs enes mesi que nheuèsse en municipi. Laguens d’aguest pressupòst, tanben se contemplarie era reubicacion deth burèu de torisme, ua zòna verda entà poder passejar tranquillament, ua piscina, gimnàs o ua bibliotèca.
Ath delà, César Ruiz-Canela, tanben afirme que “imagini un scenari qu’era nòsta gent grana de Naut Aran pogue vier a minjar ath centre de dia que volem bastir amassa damb es sòns arrèhilhs e poguen gaudir d’aguesti moments entranhables en familha”.
Aguest punt aurà d’èster ratificat pera Comission d’Urbanisme dera Val d’Aran de manèra definitiva. Un viatge s’age era autorizacion ad aguest projècte, eth consistòri començarà a preparar eth concors entara licitacion dera redaccion deth projècte.