Ua delegacion der Ajuntament de Naut Aran s’a desplaçat enquiara Hèira Internacionau de Torisme (FITUR) que se hè pendent aguesti dies en Madrid entà èster presenti ena inauguracion d’aguest eveniment de caractèr mondiau, remassar era distincion de “Los pueblos más bonitos De España”, qu’a reconeishut es localitats d’Arties e de Garòs, atau coma assistir ara presentacion deth Freeride World Tour Baqueira Beret que se hè ena estacion d’esquí aranesa de Baqueira Beret.
En aguest sens, “Los pueblos más bonitos de España” liuraràn es diplòmes as naues poblacions comprenudes laguens d’aguesta reconeishença d’encastre estatau e en que s’a artenhut plaçar as localitats araneses de Naut Aran d’Arties e Garòs. Dempús d’un gran trabalh per part des vesins, amassa damb era bailessa, Lina Fanlo e era representanta de Garòs, Maria Angels Ordax, s’a obtengut aguesta distincion que remassaràn deman madeish ath torn des 10:30 deth maitin.
Eth baile der Ajuntament de Naut Aran, César Ruiz-Canela, destaque que “ei increïble era forma ena qu’es vesins e es sòns representants elèctes an suenhat es espacis des poblacions d’Arties e Garòs. Sense dobte, formar part d’aguesta reconeishença, apòrte ua grana reputacion entara nòsta zòna e generarà un tipe de torisme que non auíem pogut atrèir enquia ara. Eth gran trabalh hèt per toti, mès sustot per Lina e Maria Àngels, a estat gratament recompensat”.
Ath delà, ua auta representacion formada peth pròpri baile deth consistòri, amassa damb eth tinent baile, David Torres, e eth còsso, Andres España, assistiràn deman as 12:00 ara presentacion deth Freeride World Tour Baqueira Beret que s’harà tanben laguens des actes enmarcadi en FITUR. Cau destacar qu’er Ajuntament de Naut Aran destine 50.000 èuros ara realizacion d’aguest eveniment internacionau, e ei eth patrocinador principau deth Freeride Junior World Tour damb ua auta aportacion de 8.000 èuros.
Sus açò, César Ruiz-Canela, concludís que ”Naut Aran a hèt un gran trabalh pendent es darrèri 30 ans en toti es airaus e ara remassam eth frut de tot er esfòrç e trabalh d’aguesti decènnis de incansable trabalh pes vesins deth nòste municipi. Èm fòrça orgulhosi de tot çò qu’artenhem a dia d’aué”.
Era presentacion deth Freeride World Tour s’harà oficiauments diuendres que ven 27 de gèr ena Plaça dera Querimònia de Salardú.