Er Ajuntament de Naut Aran a aprovat ena sua session plenària damb es vòts en favor deth grop de Convergéncia Aranesa e d’Aran Amassa e era abstencion dera formacion d’Unitat d’Aran ua modificacion pressupostària de 115.000 èuros ena que i destaquen diuèrses ajudes sociaus destinades as familhes deth municipi e ua importanta milhora d’accès ena zòna de Colomèrs.
Per çò que hè ar apartat d’ajudes sociaus, eth consistòri aufrirà ua ajuda de 15.000 èuros ara Associacion de Familhes d’Alumnes (AFA) entà poder pagar eth sobrecòst dera contractacion de monitors enes ores deth minjador. Actuauments, er aument d’estudiants en aguesti centres escolars a hèt a pujar era ràtio de mainatges e, coma conseqüéncia, a hèt a aumentar tanben eth nombre de monitors. Ei per açò que, er Ajuntament de Naut Aran, apòrte aguesta ajuda entà que non se pugen es quòtes a pairs e mairs deth municipi.
Ath delà, e, per prumèr viatge, se subvencionarà damb 25.000 èuros as familhes des poblacions d’Arties, Gessa e Salardú qu’agen as sòns hilhs en periòde dera educacion primària pr’amor que non an cap tipe d’aportacion entà afrontar aguesta despena. Sus açò, eth baile de Naut Aran, César Ruiz-Canela, explique que “auem detectat que fòrça familhes pòden auer problèmes entà poder costejar-se eth minjador des mainatges perqué non dispòsen d’ajudes de cap Administracion Publica, en tot includir eth pròpri Conselh Generau d’Aran e, per açò, des deth consistòri volem ajudar-les e aportar eth nòste gra de sable entà que non agen tantes dificultats”.
D’un aute costat, tanben s’a aprovat en madeish punt era milhora deth camin que comence ena base dera zòna de Colomèrs e que pòrte enquiath Pòrt de Ratera. Er Ajuntament de Naut Aran a obtengut ua subvencion de 60.000 èuros deth Parc Nacionau d’Aigüestòrtes e Estanh de Sant Maurici e aportarà d’auti 10.000 èuros complementaris ara milhora deth camin principau, naua senhalizacion ena zòna, e era installacion de estaques damb punta auriòla entà qu’es montanhaires non se pèrden enes dies que non i age bona visibilitat.